E desaroyo di caya den e ultimo añanan ta hopi duro

ORANJESTAD (AAN): Audrey Croes-Lacle ta e cara di e tienda iconico Maggy's, ubica den Caya Grandi.

Esaki ta un tienda di tin basta aña di existencia y cu a haci tur posibel pa sobrevivi den e ultimo añanan aki y principalmente den e temporada aki di pandemia.

Maggy's a bin den Caya Grandi na aña 1955, na e mesun lugar unda e ta ubica awendia. E tabata un cas y e parti dilanti a wordo converti den un kapsalon y un tiki retail store, Croes-Lacle a indica den entrevista cu DIARIO.

E tempo ey tabata hopi gezellig pa lanta den caya, a expresa. E famia mes a muda bay biba otro caminda mientras cu Maggy's a cuminsa crece.

Na aña 1980, Audrey Croes-Lacle a tuma encargo di henter e maneho di e tienda.

Na aña 85, cu tabata tin e ciere di Lago y hopi cos pasando, Maggy's tabata bezig ta remodela, pero el a kima y mester a basha e lugar abao. Sinembargo el a wordo reconstrui y habri bek dia 30 di October di e mesun aña. A cumpra e parti na banda y a amplia e tienda y e operacionnan.

Maggy's a conoce hopi aña dificil, hopi hende a bay di Aruba e tempo ey locual a nifica cu e poblacion tambe a baha.

E añanan a sigui pasa y cu ne hopi cos a sosode tambe. Na 2008 tabata e crisis financiero, tabata tin e atentadonan di 11 di September na Merca como tambe hopi cambio manera e retonan di e digitalisacion, a bisa.

Tin un cambio tambe cu Covid unda caya grandi ta practicamente muriendo y esnan cu ta tene na bida ta practicamente e arubianonan cu ta gusta bay den caya ainda.     

E desaroyo di caya den e ultimo añanan ta hopi duro. El a menciona e problema di parkeerplaats. E movilidad di Aruba ta stagna y esey ta haci cu e hendenan no kier, nan no kier parkeer con cu ta.

Esey ta retonan cu e ta kere ta educacion so lo por yuda surpasa e retonan cu tin dilanti aworaki, a expresa.