Hopi hende rabia!! - ORANJESTAD (AAN): Reaccionnan tabata drenta tur caminda for di pueblo
y te hasta di e parlamentarionan di otro fraccionnan y ministernan relaciona cu e ausencia di e parlamentarionan di fraccion di AVP den Sala di Staten unda a trata e tema di Presupuesto di Pais Aruba.
Un tema asina importante tabata wordo trata unda tabata tin hopi pregunta y tambe hopi informacion a bin dilanti, pero e parlamentarionan di Fraccion di AVP, cu tin e funcion di representa pueblo y controla gobierno a briya cu nan ausencia.
Hopi hende a reacciona bisando con por ta esaki posibel ya cu nan trabao ta pa ta den sala di Staten haciendo nan trabao ya cu pa esey nan ta haya un salario basta bon danki di mas di 10 mil florin pa luna.
Esaki sigur ta un muestra di nan falta di profesionalismo y sigur ta un indicacion cu nan no ta interesa den representa esnan den pueblo cu a vota pa nan.
Locual ta mas tristo ta cu esaki no ta algo nobo ya cu a mira cu esaki a sosode hopi biaha caba den sala di Parlamento unda a mira cu nan no a presenta pa cumpli cu nan trabao di informa nan mes y di representa pueblo.
Diabierna por a mira un sala di Parlamento cu atendencia di fraccion di MEP, RAIZ, MAS, Accion21, pero ni un hende di fraccion di AVP ora cu tabata haci preguntanan crucial y tabata haya contestanan al caso pa loke ta tratamento di Presupuesto 2021.
Por a compronde cu esnan di fraccion di AVP lo a rabia pasobra nan no a haya oportunidad pa papia, pero locual nan no ta bisa ta cu nan no a pone su nomber riba e sprekerslijst y pesey nan a bandona e sala como protesta.
