Opinion Publico - ORANJESTAD (AAN): Mirando cu pa varios luna nos isla, mescos cu mayoria caminda rond mundo, a wordo confronta cu problemanan debi na e pandemia di COVID-19, varios medida a wordo introduci.
Algun di e medidanan a pone entre otro cu cierto actividad no por a continua, manera por ehempel Bingo.
Awor cu pa algun tempo caba mayoria medida a wordo kita, Bingo specialmente den diferente casino ta tumando lugar atrobe y tin varios hende cu ta contento cu esaki.
Specialmente nos grandinan cu tabata tin Bingo como un di nan actividadnan principal pa participa na dje ta hopi contento.
Mayoria casino cu tabata ofrece Bingo a cuminza bek cu esaki y bo ta ripara cu casinonan ta bastante druk na cierto momento di dia.
Tin hende cu ta probecha di bay diferente Bingo, ora cu e casinonan tin diferente horario di Bingo.
Claro, tur hende mester sigui tene cuenta cu e hecho cu e virus tey ainda y cu e casonan a aumenta.
Bo ta wak si un alegria bao di hopi hende cu ta participa na Bingo, mirando cu pa varios esaki ta nan manera di diverti nan mes y topa cu amigonan.
Den e pausa, of un rato prome cu e Bingo cuminza bo por wak hendenan ta hunga carta cu otro, ta combersa of ta hunga machine.
Algo cu durante e puntonan halto di e pandemia no por a tuma lugar mucho.
Tin hendenan cu ta bende snacks y cuminda tambe na e personanan cu ta hunga Bingo y asina e personanan ey tambe ta bek haciendo algo productivo y logrando un entrada atrobe pa pone cuminda riba mesa pa nan mes y pa nan famia.
