E Congreso Teacher Care ta hopi importante pa maestronan participa

Pa nan tuma guia con pa deal cu muchanan Autista

ORANJESTAD (AAN)- Sue-Leida Carolina, Psicologo di Bureau Multidisciplinair Centrum Aruba (MDC), den entrevista cu DIARIO a menciona cu e Congreso “Teacher Care” ta hopi importante, den sentido cu e ta duna guia na e maestronan.

Sue-Leida mes ta un psicologo cu ta yuda den salud mental na maestronan y esnan cu ta traha na Scol, pasobra ora cu ta deal cu muchanan cu tin condicionnan manera Autismo of ADHD, esaki ta absorbe hopi di un hende y tin biaha e maestronan tambe mester di guia pa cu esaki.

   “Esaki no ta precies cu e persona cu Autismo sino pa esun cu ta yud’e. Mi ta duna terapia, pues nos ta duna guia individual basico na hendenan, y otro parti di mi trabao ta pa duna e diagnostico di Autismo.

P’esey tambe, nos ta haci diferente pasonan pa nos por yega. No ta asina sin mas nos por duna un diagnostico na un mucha. Nos tin cu wak diferente situacion tambe”, Sue-Leida Carolina a splica.

El comenta cu sa pasa cu den un klas e maestra ta deal cu mas cu un caso di alumno cu Autismo, y tin biaha e ta bira un tiki mucho di mas pa e docente.

   “Anto e ora ey e ta cuminza sinti otro efectonan tambe, por ehemplo e no ta drumi bon, e no ta haya gana di bay trabao, anto e ta cuminza bay AO y bo kier pa nan sigui na scol pasobra nos sa cu no tin e forza eynan. Kiermen, door di yuda nan, papia di nan situacionnan, e ta pone cu nan por bay bek na nan trabao, y yude mas guia y tips con nan por yuda e mucha. Pues ta importante pa e educadornan tuma e guia aki. Eigenlijk, salud mental mester ta na prome lugar, pasobra bo no por haci nada sin cu bo tin e energia y pasenshi pa bo sigui cu bo trabao”, Psicologo Sue-Leida Carolina a señala.