Minister Gerlien Croes:
ORANJESTAD (AAN)-- Minister Gerlien Croes a expresa den entrevista cu DIARIO, cu e ta hopi contento di a participa, un biaha mas, den un Congreso organiza pa Fundacion Autismo Aruba, ya cu no ta prome biaha cu e ta parti di dje.
“Tur aña nos ta wak cu e necesidadnan ta bira mas grandi. Mi tin cu reconoce cu mi ta gradici inmensamente, cu Fundacion Autismo algun aña atras a reconoce y a adelanta su mes riba e tema aki, pasobra esaki ta un topico cu ta desaroyando, y e magnitud di e necesidadnan ta birando mas grandi, y nos tin bon colaboracion cu nan, dunando sosten pa nos por yuda e causa. Pedro principalmente cerca mi, den e parti educativo, e reconocimento di muchanan cu tin un necesidad adicional, den e caso aki, ta cuminza ya caba cu nan dos, tres aña bin ariba”, e dignatario a señala.
Minister Croes a agrega cu su responsabilidad tambe ta grandi, den e hecho cu locual cu gobierno a bin encontra ta un necesidad grandi den e dienstnan y na scolnan. “Den e caso aki, MDC (Bureau Centro Multidisciplinario) ultimo aña y mey nos a purba duna ayudo door di empodera nan mas cu personal: logopedist, sicologo, ondersteuner, y nan tin na e momento aki seis sicologo den “ggz psycholoog opleiding”, Minister Gerlien Croes a relata.
El a agrega cu MDC su rol tabata cuminza cu mucha di 4 aña pero awo mester amplia e edad, y hacie di 0 pa 4 aña, pues mas trempan.
Esey ta uno, el a splica, pero e sistema di zorg den full e sistema educacional ta un peso inmenso pa nos educadornan. E reto cu nos tin ta, no solamente e necesidad di personal profesional, pero alavez hasta si bon tin e personanan aki bo ta ripara cu tur aña tin cosnan nobo ta drenta.
“Pues, Autismo ta hopi amplio. Tin diferente tipo di autismo. Por ehemplo, awe of mañan bo ta haci un workshop pa nos docentenan riba e tema con bo ta identifica autismo, pero despues di un aña bo ta wak cu tin otro espectronan cu no sa di dje, cu a bin nobo. Locual ta hopi importante ta e intervencion trempan. Cu di trempan bo reconoce pa bo por guia e mucha. E realidad tambe, cu nos ta bibando cu ne na Aruba, ta cu e grupo cu e necesidad aki ta hopi grandi. Pero tambe bo ta mira cu hopi iniciativa individual a tuma lugar. Tin scolnan priva cu a wordo lanta pa acapara e grupo cu no por ta den e area di onderwijs” e mandatario a trece dilanti.
