Mira cuanto temblor registra den menos di 20 ora
ORANJESTAD (AAN): E imagen aki ta mustra cuanto movimento sismico a wordo registra desde Diabierna anochi pa 9:28 pm, te cu Diasabra atardi pa 5:13 pm Y casi tur ta den cercania di estado di La Guaira y tambe Distrito Federal di Venezuela, incluyendo capital di Caracas.
E prome cu a registra tabata Diabierna pa 9:28 pm, di magnitud di 2.6º riba Scala di Richter y esaki tabatin su epicentro como 44 km Noordoost di ciudad Maracay di estado Aragua. Despues a sigui uno di 1.8º como 26 km Noordwest di San Felipe pa 11:18 pm. Pa 11:46 pm a registra uno di 1.3º magnitud como 26 km west di Higuerote. Esey ta e punto mas pariba riba e mapa aki.
Asina Diasabra a yega, y pa 12:09 am a registra uno di 1.7º magnitud apenas 3 km Noordoost di Caracas. Pa 12:27 am a registra uno di 1.8º magnitud na 12 km panort di La Guaira. Pa 1:14 am a registra uno di 1.8º magnitud na 3 km Noordoost di Naiguata. Pa 1:31 am a registra uno di 2.3º magnitud na 45 km panort di Maracay. Pa 1:44 am a registra uno di 1.8º magnitud na 7 zuidoost di La Guaira.
Despues a start bek banda di 3:03 am, cu uno di 2.2º magnitud na 35 km pabao di Churuguara. Esaki ta e punto mas west riba e mapa aki. Pa 3:52 am a registra uno di 1.7º magnitud na 47 km panort di Maracay. Despues di esey e area a keda “keto y trankil” pa mas di 13 ora largo.
Te Diasabra pa 5:11 pm a registra uno atrobe di 2.2º magnitud na 8 km west di La Guaira. Pa 5:13 pm, pues rapidamente despues di e prome, a registra uno di 2.4º magnitud na 36 km zuidoost di Bachaquero.
Den 20 ora, un total di 12 temblor chikito a registra den e area direct di La Guaira na Venezuela. E mesun area aki a wordo azota pa dos temblor devastador riba e atardi di 24 di Juni 2026. E movimento di tera cu ta bolbe wordo registra ta mustra con activo e zona a keda.
