E cantidad di desperdicio cu ta yega Parkietenbos ta un desaster nacional

Joseph Everon, CEO di Utilities Aruba NV

• A tuma accion inmediato
• A bestel dos mobile incinerator 

ORANJESTAD (AAN) Manera ta conoci, Utilities Aruba NV, a tuma over e maneho completo di Incinerator na Aruba. Joseph Everon, CEO y Director Interino di Utilities, den entrevista cu DIARIO, a referi na e situacion desastroso cu tin aworaki.

   Everon a indica cu tabata tin un scarcedad di capacidad di incinerator, unda cu no tabatin e capacidad pa incinera tur e fluho di desperdicio cu ta yega Parkietenbos.

   Esaki ta encera desperdicionan di material medico, cadaver di animal, y slosh. “Esaki ta manera un desaster nacional, mirando cu nos tin 50 plus container cu desperdicio medico, y e ta creciendo. Esey ta e situacion cu nos tin aworaki. Accionnan a wordo tuma inmediatamente, cu nos ta bay expande e incinerator capacity; ya tin dos incinerator grandi cu a wordo bestel, cu ta na caminda. Den luna di September tin test y pa fin di aña, e di cuater cuartal e incineratornan lo ta in place, pero e dos capacidadnan di incinerator grandi no tabata suficiente”, Everon a relata.

   El a agrega cu mirando tempo di entrega di e incinerator grandi a scoge pa bin cu dos “mobile incinerator” cu no ta grandi, manera e dosnan anterior pero si, kico nan ta bay yuda cu ne, ta detene e crecemento di e retrazo (‘backlog’) mas.

   “Pues, esey lo bay alivia e fluho diario di desperdicio medico waste of otro sushinan cu ta drenta pa no sigui crece e backlog cu tin na e momentonan aki”, Joseph Everon a señala.

   Everon a indica cu pa Ley Internacional mester portrata y neutraliza desperdicio medico dentro di 48 ora. “Pues, nos mester a tuma e decision pa bin cu dos mobile units cu nos por canaliza e crecemento di ‘desperdicio medico’ y tambe, mesora, nos ta cuminza cu e plannan pa den 2026 nos bin cu mas capacidad di incinerator, pa nos por tin un bon maneho rond di kimamento di ‘incinerator process’”, CEO di Utilities Aruba NV, a relata.