ORANJESTAD (AAN): Durante di un encuentro cu prensa recientemente, director di Utilities Joseph Everon a papia riba diferente topico.
Un di e topiconan aki tabata un asina yama ‘Integrated Resource Plan’, cu ta parti di estudionan cu e compania ta haci, pa e tempo te cu 2030 y mas leu.
“E Integrated Resource Plan ta pa bo wak cua mix di energia ta mihor pa futuro, mirando e demanda cu ta bay tin mirando e crecemento di e isla, e tecnologia cu ta bay tin y con bo red ta bay reacciona cu mas penetracion di energia renobabel”.
Banda di esaki lo tin cu wak kico e impacto di e energia ta bay ta pa economia, segun Everon.
El a sigui bisa cu e ta un plan integral via cual lo wak exactamente kico e pasonan ta y den ki añanan tin cu Haci inversionnan, pa e produccion di energia ta confiable, pagable y sostenible pa Aruba.
“E fasenan cu nos tin di 2025 te cu 2030, ta pa yega e meta di 50% di penetracion di energia renobabel”.
Esaki entre otro via e expansion di mulinanan di biento, ‘repowering’ di Vader Piet, expansion di Sunrise Solar Park pa fase 2, enfoke riba e baterianan y e parti di automatizacion, cu ta e Energy Management System, segun e director di Utilities.
El a sigui bisa cu hunto cu WEB y Elmar lo traha riba e stabilidad di e red, pero tambe e automatizacionnan cu mester wordo haci den e red.
Fase dos ta bay ta a base di e resultadonan di e Integrated Resource Plan.
