Hose Figaroa, Presidente di FTA:
- E ta construi instancianan mas fuerte, ta proteha derecho di trahado y ta contribui cu progreso di Aruba
ORANJESTAD (AAN) Lider di Federacion di Trahadornan di Aruba (FTA), Hose Figaroa, a subraya, den entrevista cu DIARIO, den cuadro di e negociacion di un CAO exitoso entre FTA/ANSA, cu dialogo social ta sumamente importante.
“Dialogo ta hiba na beneficionan no solamente pa empleado, ni e dunador di trabao, pero pa Aruba en general, si nos tene na cuenta un instancia manera ANSA, cu ta sumamente importante. Di nos parti tambe, nos kier gradici tur esnan cu a tuma parti den e negociacion, na prome lugar e team negociado di ANSA; sin nan nos no por a yega na e resultadonan, e team negociado di FTA, señor Giel, director di Departamento di Negociacion, nos colega Hurista Ronny Geerman cu a asisti y tambe negocia den henter e proceso aki, y finalmente, no di menos importancia, e trahadornan cu a pone nan confianza un bez mas, den nos di dos CAO aki, den FTA, pa representa nan den nan asuntonan laboral”, Hose Figaroa, Presidente di FTA a relata.
El a reitera cu prueba cu partnership social ta funciona, e ta construi instancianan mas fuerte, e ta proteha derechonan di e trahado, y ta contribui na progreso di Aruba en general.
