E aña aki a pone pre-Hospital solamente pa Lighting Parade y Parada Grandi di Playaa

Rino Hermans, Director di CMO:

ORANJESTAD (AAN)--  Rino Hermans, Director di CMO (Crisis Management Office), den entrevista cu Matutino DIARIO a splica, cu e aña aki solamente den dos evento di carnaval ta haci uso di pre-Hospital. E prome tabata durante Parada di Luz, y e siguiente ta Diadomingo proximo, durante e Parada Grandi.

Rino Hermans a splica cu desde cu nan a cambia di Rampen Bestrijding pa Crisis Beheersing, esey ta inclui cu den un evento unda tin mas cu dos mil hende, CMO ta traha un plan di seguridad hunto cu e partnernan cu ta envolvi den e evento, pa nan sincroniza tur e plannan operacional y asina nan ta prepara.

“Den esey a bin cu pre-Hospital pa envez di nos uza e eerste hulpnan, nos ta uza e pre-Hospital pa baha e druk riba eerste hulp. Nos a cuminza cu seis evento y nos a bahe pa cuater y awo nos ta na dos. E biaha aki tabata Lighting Parade di Playa, y e Parada Grandi di Playa”, Hermans a indica.

Esaki debi cu ora nan a recauda e datanan di e eventonan anterior, a ripara cu eficiencia y efectividad di pre-Hospital, loke a haya na pashent lo no a pone Eerste Hulp druk.

Pre-Hospital ta situa pabao di e stacionamento di Arubus, pariba di DOW bieu. Y tin un post meymey cu ta na Adrian Lacle Boulevard y cu ta den man di Cruz Cora. Pa su ubicacion, di eynan nan ta manda e pashent na pre-Hospital y di aki ambulance ta traslada e persona pa HOH.

Hermans a remarca cu e sistema di seguridad ta hayando su balor, y tin reunion cu frecuencia cu SMAC, cu ta e doo di e vergunning cu ta encarga cu esey y tur siman e stakeholders ta reuni pa evalua kico a bay bon, kico no a bay bon y kico mester drecha pa e siguiente evento cu ta un parada riba caminda grandi. “Mi ta satisfecho con e proceso ta bayendo hunto cu SMAC”, Rino Hermans a expresa.