Pasadia Briyo di Solo ta invita Aruba pa bishita ‘Clien-te’ y aporta na te cu clientenan nan mes ta fabrica

Jacqueline Richardson:

ORANJESTAD (AAN):  Pasadia Briyo di Solo tin 60 cliente y 12 trahado. E centro ta haci diferente actividad pa e clientenan durante dianan di siman na unda ta trata diferente topico pa siña e clientenan pa yuda nan mes na cas.

Jacqueline Richardson, Vocero di Pasadiya Briyo di Solo, a remarca cu nan clientenan ta tiki mas pisa den e deficiencia y ta rekeri mas atencion. Pa cua motibo tambe nan ta traha den grupo di 12 cliente. El a remarca cu edad pa drenta Pasadia Briyo di Solo ta for di 16 aña na unda cu nan ta traha riba locual e clientenan sa caba pa asina nan mantene loke cu nan sa caba. Esaki, segun e, lo yuda nan pa nan sigui yuda na cas. Tambe, el a expresa cu ta e clientenan ta siña hopi otro cos tambe na e centro.

Señora Richardson a indica cu no lo tin plan pa ampliacion den 2026 pero nan ta bay paso a pasa cu loke nan tin caba. Nan ta enfoca na e momento aki riba nan proyecto di te, ‘Clien-te’.

Na December ultimo Pasadiya Briyo di Solo a tene un exitoso bazaar pa recauda fondo pa e proyecto aki y na januari e aña aki, e soño aki a bira un realidad. ‘Clien-te’ ta habri pa famianan di clientenan, pero sigur pa Aruba en general pasa cumpra te cu clientenan di Pasadiya Briyo di Solo mes ta fabrica. Aporte di un y tur sigur ta yuda pa e centro pa nos hendenan special haci mucho mas den brinda amor, atencion y cuido.