ORANJESTAD (AAN) – Na Hospital Dr. Horacio Oduber, a tuma lugar un conferencia di prensa, Diahuebs mainta, den cual Dr. Joel Raijnherc (Director di Instituto Medico San Nicolas) tambe a hiba palabra.
Aki a elabora riba un rapport traha pa un Comision di Cuido cu e meta di baha gasto den cuido medico, sin cu e calidad halto di cuido wordo perhudica.
Dr. Raijnherc a acentua cu e conferencia di prensa aki ta hopi importante pa nan, como dunadornan di cuido y el a gradici señor Ronny van Trigt como presidente di e Comision, cu a yuda pa bin cu alternativanan cu ta realizable y cu, toch, na prome instancia nan ta keda cu un bon cuido pa Aruba su poblacion, y cu nan ta busca manera di reduci e gastonan den futuro, pa baha e costonan en general.
“E problema ta, cu cuido no ta un ‘speed boat’. Bo no ta bire 180 grado den un biaha. Nos ta un tankero grandi: poco poco bo por bire, sin cu bo bay kibre. Anto esey ta loke ta pasando awo”, Dr. Joel Raijnherc a subraya.
Raijnherc ta sinti orguyoso di tey eynan, pasobra ta prome biaha cu tur e dunadornan di cuido ta para riba un linea.
“Claro, nos tin diferencia di opinion entre otro, pero ta e prome biaha cu nos por a uni, traha hunto, bin cu un programa cu ta realistico, sostenible y cu ta bay zorg cu nos keda cu e calidad di cuido, grandi y halto, cu nos ta dunando na Aruba; e gastonan, ya caba, no ta asina excesivo”, Dr. Raijnherc a subraya.
Un di aspecto cu e dunadornan di cuido ta realizando e ultimo añanan, Raijnherc a splica, ta cu e cantidad di pashentnan cu Aruba ta manda afo, ta bahando, y el a expresa cu esaki ta algo di lo cual mester ta hopi orguyoso riba dje.
“Nos pashentnan di curazon ta haya tratamento aki na Aruba. Nos pashentnan di wowo, di bestraling, tur esaki ta algo cu nos a logra aki na Aruba, door cu tur e dunadornan di cuido ta trahando mas, y mas, hunto”, Dr. Raijnherc a bisa.
Logicamente, e gastonan tey pasobra pa reduci gasto mester a inverti prome, pa por duna e cuido localmente.
“Si Hulanda sigui riba e manera aki, sin cu nos ta wak na unda pa corta y con por reduci gasto, na un manera cu por sigura cu nos ta keda duna un calidad halto di cuido, e unico cos cu ta pasa ta cu nos ta duna menos cuido y cuido di menos calidad y cu nos ta bay haya cu nos tin cu manda mas hende afo”, el a remarca.
Dr. Raijnherc a señala cu e dunadornan di cuido sa cu nan por reduci gasto, cu nan por haci e calidad di cuido miho, pero e tin cu wordo temporaliza.
“Nos no por stop’e awo, y ban wak aki un par di aña con nos ta bay mehore atrobe. Mi kier a djis bisa un biaha mas cu mi ta gradici cu nos a haya sosten di Departamento di Salud Publico y reaccionnan di AZV. No semper nos ta di acuerdo cu e reaccionnan cu nos ta haya; nos ta kere cu un di e problemanan primario ta con pa convence Hulanda, cu e manera con nan ta cortando gasto awo, no ta factible y no ta responsable y cu nos kier traha hunto, y esaki ta hopi cla den e rapport cu nos a traha”, Dr. Raijnherc a señala.
El a gradici tur su coleganan cu a inverti hopi ora di trabao cu a bay den e rapport aki y e ta kere cu esaki ta algo unico cu nunca antes a wordo poni dilanti nos Isla.
