Durante encuentro literario na Biblioteca lo honra defensor di Papiamento Sr. Frank Martinus

Linguista Sra. Joyce Pereira:

ORANJESTAD (AAN):   Linguista Joyce Pereira ta un di e organisadornan di e encuentro literario cu lo tuma luga dia 17 di december proximo na Biblioteca Nacional Aruba. El a indica cu e anochi aki publico presente lo por tende via un entrevista cu lo tin cu cada un di e autornan presente, con e autor ta mira su idioma, esta Papiamento, den su obranan. Kico ta e exigencianan cu e ta pone pa su mes pa por skirbi un bon obra na Papiamento.

            Sra. Pereira a agrega cu ta algo lamentabel aki na Aruba cu ora un buki keda publica, hopi biaha e dia ey e ta haya tur atencion y despues no tin niun posibilidad mas pa e buki keda den bista di publico pa e hendenan sa cu e buki t'ey.

            Esaki ta un manera pa yega un cierto momento na recomendacion pa instancianan pa wak kico por haci pa desaroya e literatura, laga pueblo lesa mas, etc, el a declara.

            E programa ta basta varia. Tin seis entrevista y un charla pa cuminsa di Wim Rutgers. Despues di e entrevistanan tin oportunidad pa publico tambe interactua cu e autornan. A crea tempo den e programa pa tin un intercambio entre e publico y e autornan, Sra. Pereira a duna di conoce.

            El a agrega cu e hoben Jennifer Maduro, cu a gana Arte di Palabra aki na Aruba, e lo declama dos poema. Tin tambe na cuminsamento y na final musica bibo pa completa un celebracion di cultura y sociedad.

            E anochi aki lo ta dedica na un gran maestro di palabra y defensor di Papiamento, Frank Martinus Arion, kende a laga un herencia literario di gran balor pa Aruba y su futuro generacionnan.