Els van Homelen, directora:
ORANJESTAD (AAN) – Stichting SVGA (Stichting pa personanan cu limitacion intelectual) a cumpli 60 aña di existencia recientemente. Señora Els van Homelen, den un entrevista cu DIARIO, a elabora al respecto.
Van Homelen a menciona cu e fundacion a wordo lanta 60 aña pasa door di señora Christina van der Berg y dos persona mas. Y e di 60 aniversario aki a wordo celebra cu SVGA su personal y clientenan.
“E guynan aki ta tremendo! Nan a organiza full un feria di wega cu tur nos clientenan a goza di e dia, hungando hunto y nan a siña algo otro. Dus, nos a pasa hopi dushi mes”, directora Els van Homelen a expresa.
Stichting Verstandelijk Gehandicaten Aruba (SVGA), ta un fundacion hopi grandi, cu tin siete departamento, pa personanan cu limitacion intelectual. “Nos tin un scol Dun’un man, Pasadia Bibito Pin pa muchanan, CDC, Man na Obra cu a pa adulto, y Pasadia Briyo di Solo. Banda di esey nos tin dos cas pa personanan cu no por biba cerca nan famia. Nos tin Cas Blench pa Mucha y Cas Sjabururi pa adulto” Els van Homelen a splica.
El a señala cu ta hopi importante pa famia cu tin un persona special, pa acerca SVGA, pa haya sosten, pa e persona por bira mas independiente posible y asina forma parti di e comunidad y por siña, sigui desaroya su mes, y ta hopi importante pa e Stichting por brinda esaki na Comunidad.
Actualmente SVGA tin 250 cliente tur dia, tin cien trahado pero mester ta mas.
“Pasobra, por ehemplo, na e momentonan aki nos ti un lista di spera masha grandi mes pa Pasadia Bibito Pin, tin muchanan na cas cu no ta haya e cuido cu nan merece, loke ta hopi tristo. Tin añanan cu nos ta bringa pa un onderwijs special pa e clientenan cu ta sali di di Scol Dun’un Man cu por sigui cu enseñanza, pasobra nos tur nos muchanan por siña te 20, 21, 22 aña, y nos muchanan ta sali for di scol cu 16 aña y despues nan mester bay na nos otro departamento. E ta jammer pasobra nan tambe por sigui desaroya un tiki mas. Esey ta un reto hopi grandi y e ta un reto pa tur e fundacionnan di parti di subsidio. Nos ta spera cu awo cu nos haya un gobierno nobo, lo haya e sosten pa e fundacionnan y despues pa nos haya un subsidio husto, pa nos por cumpli cu e necesidadnan di nos clientenan”, señora van Homelen a relata.
