ORANJESTAD (AAN): Biblioteca Nacional Aruba a ricibi algun ehemplar di e ultimo obra di Arturo Desimone pa su coleccion.
Nan ta masha contento cu sr. Desimone a pasa pa haci un entrega oficial di ‘Kibocacion Entre Luz y Boca ‘. Un danki tambe na sr. Pancho Geerman, Joyce L. Pereira y sr. Joe Fortin pa nan contribucion den forma di un reseña di e obra aki. Pronto e obra lo ta den circulacion pa miembronan y bishitante. E buki ta obtenibel na 2 libreria, Plaza Bookshop y DeWit & Vandorp Bookstore.
Pancho Geerman: “‘Kibocacion Entre Luz y Boca ‘ta un obra cu ta cuminda e lector pa pela cu su caweta, cautela, perserverancia y dedicacion e contenido y nificacion(nan) di cada poema. Cada un, irespecto idioma, y cada pintura, tin su misterio cu ta pica bo cerebro y bo sentimentonan. Uzo di Papiamento y Papiamentu ta reda e relacion di poemanan cu Aruba y/o Corsou, specificamente elementonan cultural di cada isla.
E autor ta logra pa medio di un cocktail di (mal) chansa, chercha y puña pa expone critica den cada idioma riba entre otro turismo, hipocrecia, sclavitud/dependencia mental y abuso di poder. Cada figura mitico of universal invoca y referencia indigena of religioso tin un bahul di nificacion, historia y mensahe cu ta fortalece e caracter y spirito di cada escritura. Arturo Desimone ta logra di forma unico y spectacular pa engrandece y fortifica Papiamentu/Papiamento door di uza palabra-/expresionnan cu poco ta ser uza awendia, door di adapta palabranan di otro idioma y specialmente door di haci “magia (surealistico)” cu expresionnan propio …”
Arturo Desimone, (Aruba, 1984) escritor, artista y traductor literario, a nace na Aruba, e isla na unda el a pasa su prome 20 añanan di bida. Pasobra el a lanta den contexto di un famia cu tabata combina varios cultura (tata Argentino y mama Arubiano, pero di origen Polaco, Ruso y Mericano), tempran den su hubentud e tabata exponi na e arte, musica y literatura di paisnan lehano. Despues el a biba varios periodo na Hulanda y na Argentina.
Como artista visual Desimone a expone su dibuhonan na varios galeria. Na 2019 e tabata finalista di e organisacion “Stichting El Hizjra” pa escritornan inmigrante hoben na Hulanda.
