Durante e 'Vacunathon' lo vacuna entre 10 mil pa 15 mil persona e weekend aki

ORANJESTAD (AAN):  Diaranson atardi, durante un conferencia di prensa na Centro Libertador Betico Croes, Minister di Turismo, Salubridad Publico y Deporte,

Dangui Oduber a duna informacion detaya relaciona cu e 'Vacunathon' cu lo tuma lugar diasabra y diadomingo.

E weekend aki esnan cu no a vacuna ainda por yega na e localidad designa cu nan cachi di AZV. Nan por 'walk in' pa haya nan prome vacuna. Ta papiando akinan di personanan mayor di edad cu ainda no a vacuna y cu ta personanan registra na Censo y tambe esnan indocumenta cu mas di 6 luna na Aruba. Turista no ta permiti.

Minister Oduber a laga sa desde 17 di Februari, su ministerio hunto cu Departamento di salud ta bezig cu e proceso di vacunacion. El a bisa cu comunidad ta hopi satisfecho con comunidad ta respondiendo na e yamada pa tuma e vacuna.

"E vacuna ta nos solucion pa hunto, den union, nos por logra vence e pandemia aki", a expresa.

Awo despues di 10 siman ta bayendo den direccion caba pa por yega 50 mil persona cu ya caba a haya e vacuna. Diaranson mainta a haya e ultimo cifranan te cu diamars anochi y ta yegando 44 mil persona cu ya caba na haya nan dos dosis, a bisa.

Si sigui riba e ritmo aki, pa diabierna lo cera e siman cu 50 mil persona vacuna.

Conhuntamente cu algun stakeholders a pensa riba un idea cu a wordo lansa diaranson atardi cual ta cu e fin di siman aki lo tene dos dia nacional di vacunacion, diasabra y diadomingo, cuminsando for di 8 am te cu 4 pm na cuatro localidad.

            Ta bay tin 4 priklocatie habri y e meta tras di esaki ta pa logra vacuna entre 10 mil cu 15 mil persona den e dos dianan aki, pa yega na un total di 65 mil persona vacuna pa e fin di siman aki, Minister Oduber a remarca.

E cantidad aki ta rond di 66 % di e poblacion y si por logra esaki por cuminsa considera pa flexibilisa y suavisa e medidanan cu tin actualmente. A opta pa acelera e proceso di vacunacion y esaki lo wordo realisa haciendo uzo di e dos dianan aki den e campaña nacional di vacunacion (Vacunathon) caminda tur esnan cu no a vacuna ainda por yega eynan cu nan carchi di AZV of nan ID (den caso di personanan indocumenta cu tin mas di 6 luna na Aruba).

Cu esaki lo yega na cerca di e 'herd immunity' cu a pone como meta ora cu a cuminsa cu e programa di vacunacion, a bisa.

E cuatro localidad cu ta bay uza como 'priklocatie' ta Centro Libertador Betico Croes na Santa Cruz, Ballroom di Ritz Carlton Hotel, Club Don Bosco y Teresita Center na San Nicolas.