ORANJESTAD (AAN): E numbernan cu a sali Diamars anochi pa sorteo di Mini Mega tabata 19, 25, 26, y 30. Mega Ball tabata 14.
Esakinan ta wordo considera “numbernan halto” cu den statistica rond mundo, masha poco biaha ta produci ganador. Hopi biaha ora numbernan ta abao, bo ta haya hende ta gana esaki.
Pero e biaha aki, na Aruba tabatin un persona cu si tabatin e numbernan ey exactamente poni! Ta trata aki di Jairo v.d. L. kende a reconoce mesora e numbernan ey, como cu e ta hunga nan semper vast pa wega di Mini Mega. E numbernan ey ta fechanan di su casa y yiunan. Como cu el a paga 2 Florin extra ora di cumpra su ticket, el a participa den Mega Plus tambe.
E alegria tabata inmenso ora Jairo a confirma cu e tabata e unico ganador di e jackpot di Diamars anochi, pues el a gana 1.125.000 Florin, birando asina e di dos Miyonario nobo pa aña 2021 na Aruba.
Pa tal motibo Diaranson mainta trempan mes el a acudi na oficina di Lotto na Playa pa reclama su premio. Aki nan a mira cu el a pone su firma na e banda patras di e ticket, y a pasa pa scan e barcode. E computer a confirma cu aki tin e ganador di 725.000 Florin di Mini Mega, y 500.000 Florin di Mega Plus, pa asina bira total 1.125.000 Florin.
Mesora nan a traha pa transferi e premio electronicamente, pa asina su cuenta di banco a bira gordo instantaneamente.
Jairo a indica cu e ticket ganador el a cumpra na Cura Cabay Lottery. Masha pabien na e ganador.
