Durante bishita di Embahadora na Washington y di Consul General di Reino na Miami

Gobierno a organisa un encuentro cu sector priva

ORANJESTAD (AAN): Embahadora di Reino na Washington, señora Birgitta Tazelaar y Consul General di Reino na Miami señora Lisette den Breems ta na Aruba pa un bishita pa cera conoci cu Gobierno di Aruba y haya un miho conocemento di e vision general di Gabinete Wever-Croes, con pa traha mas hunto y kico ta e oportunidadnan cu nan ta mira pa Aruba na Merca.

            Diahuebs anochi, den conexion cu e bishita, Minister di Asunto Economico, Comunicacion, y Desaroyo Sostenibel Geoffrey Wever, a organisa un encuentro cu sector priva na Taste My Aruba. E meta di e encuentro aki cu sector priva ta pa e Consul General y Embahadora scucha di nan banda tambe, nan idea y sugerencianan di e oportunidadnan cu por tin.

            Durante e pandemia, nos a realisa cu Aruba no por ta dependiente solamente di un pilar economico, y p’esey pa 2024, Aña di Stabilidad y Prosperidad, diversificacion di e economia, pa Gobierno di Aruba ta un prioridad. Pa logra esaki, Gobierno mester por conta cu sector priva y probecha di tur oportunidad cu tin den Merca.

            “Tanto e embahadora y e consul general na Miami ta sumamente encanta cu Aruba y nan ta sumamente impresiona di e maneho cu Gobierno a hiba durante Covid y con lihe Aruba ta recuperando y e ambicionnan cu nos tin pa sigui crece”, Prome Minister Evelyn Wever-Croes a expresa.