ORANJESTAD (AAN): Manera cu DIARIO a trece dilanti siman pasa, riba Diasabra cu a pasa e proyecto di Agroforestria Sintropico na scolnan a cuminsa.
A haci peticion pa boluntarionan bay duna un man, y yuda crea un plantacion di mata riba tereno di e scolnan cu a worde scogi.
Esun prome na turno tabata Scol Basico Washington, den un pida habri patras den nan tereno.
Esaki ta un iniciativa cu tin como meta pa educa e siguiente generacion riba e balornan di agricultura sostenibel mientras ta promove un interes den sector primario.
E plantamento di Living Soil Aruba, a cuminsa ya for di 7:00 am net ora solo a cuminsa sali na Scol Basico Washington. Boluntarionan a marca e tereno, a traha cu e tera, benta fertilizante y gordura, y asina planta tres liña di mata cu como 15 mata di fruta den cada rij.
Nan a benta hopi simia rond di e matanan, y den dos area special pa berdura. Tambe a sembra e 4 linea di yerba mombassa, y na final a muha henter e tereno ora cu nan a finalisa banda di 2:00 pm.
Un pabien na tur boluntario, muchanan, y esnan di Living Soil Aruba cu a haci e trabao magnifico aki. Hopi di nan a bin cu nan mesun herment. Awor tin di djis keda muha e tereno, y warda e hardin aki bin na bida.
DIARIO a compronde cu e siguiente proyecto lo ta dia 17 di Februari 2024 na Scol Primario Kudawecha.
