DOW bezig cu varios trabao riba caminda den e proximo dianan

ORANJESTAD (AAN):  Departamento di Obra Publico kier a informa henter pueblo di Aruba cu entrante dialuna 24 di mei 2021 trabounan di “dredging” lo inicia na Barcadera,

unda cu lo saca e santo blanco cu a bay den lama y pone esaki bek riba tera na nos witzand depot di DOW na Barcadera.

Trabaonan ta premira cu lo por termina pa fin di augustus 2021. Trabou di “dredging” ta uno necesario pa asina por recobra e santo blanco cu durante añas biento a supla bay den lama y cu DOW ta haci uzo di dje pa proyectonan di gobierno y tambe ora di drecha beachnan rond di nos isla despues di mal temponan cu sa pasa door di tormentanan tropical, horcan, etc.

E trabou lo wordo ehecuta door di Varadero Aruba Marina & Boatyard y lo wordo supervisa door di DOW.

Por ultimo e trabaonan di preparacion a wordo haci den cooperacion cu DIP y Directie Natuur en Milieu. 

SOLITO/TANKI LEENDERT 

Tambe dialuna dia 24 di mei 2021 te cu diabierna 28 di mei 2021 trabounan di recap fase 1 lo inicia na Solito/Tanki Leendert.

E trabaonan akinan ta encera frees e caminda y pone un capa di asfalt nobo. E caminda cu lo wordo asfalta lo ta di Solito #2 pa Tanki Leendert #22. E Trabaonan akinan lo wordo haci entre 8’or di mainta te 4’or di atardi, pero e caminda lo keda 24/7 cera.

Ruta di desviacion lo wordo indica cu borchi y baricadanan di aviso.

Riba e mesun proyecto akinan, dialuna dia 31 di mei 2021 te dia 11 di juni 2021 tentativo lo cera fase 2 di Solito/Kamerlingh Onnestraat pa asina tambe haci un recap di e caminda.

Mester menciona cu lo bini un rotonde chikito na e crusada di RCA. Den transcurso di siman nos lo publica con e ruta di desviacion lo bay ta pa e ceramento akinan.

Mester menciona cu e caminda akinan tambe lo keda 24/7 cera. 

SABANA BASORA 

Alabes dialuna 24 di mei 2021 te diaranson 26 di mei 2021, lo asfalta na Sabana Basora 4J te cu 12F y di Sabana Basora 10D te cu 12A. Trabaonan lo wordo haci entre 8’or di mainta te 4’or di atardi. Mirando cu no tin un otro ruta di desviacion pa e habitantenan cu lo haya asfalt dilanti nan vivienda lo mester warda te ora e personalnan hala e baricanan pa asina e habitantenan por yega nan vivienda. Por fabor tuma bon nota di esaki.

SANTA CRUZ 

Por ultimo dialuna dia 24 di mei 2021 te cu 29 di mei 2021 departamento di Riolering lo mester haci trabaonan di mantencion na St. Cruz #128 te cu St. Cruz #144. Trabaonan lo wordo haci entre 8’or di mainta te 4’or di atardi.

DOW ta spera di por a informa henter pueblo di Aruba debidamente di tur e trabaonan cu nan departamento tin planea pa e siman benidero. Por favor tuma bon nota.