ORANJESTAD (AAN) — “Covid-19 a costa Aruba 106 bida y Gobierno ta keda den convivencia, cu tur esnan cu a perde un ser keri”,
ta palabranan di Minister Presidente Evelyn Wever-Croes, den conferencia di prensa Diahuebs.
Minister Presidente a haci un yamada na comunidad pa por fabor yuda, pa nos pais no perde mas hende, door di e pandemia. El a enfatiza pa nos tur proteha esnan mas vulnerable den nos comunidad.
“Tres siman pasa den un discurso nacional, mi a indica cu e fin di e caminda ta na bista. Cu nos ta weita e luz na final di e tunel, y cu e vacunathon aki, nos ta mas cerca di dje tambe. Na e momentonan aki, mas di 58 mil persona a vacuna, cu ta un 59% di nos poblacion y por mira caba e efectonan positivo”, Minister Presidente a bisa.
E dignatario a expresa cu awo por mira cu hopi menos hende ta pega cu e virus, menos hende ta bira malo bay na Hospital, y tambe cu turistanan a bin bek.
“Nos turismo ta den crecemento bek, nos ta mira cu nos economia ta habriendo poco, poco; hendenan ta hayando trabao y esaki ta locual nos kier logra. Imagina bo si bo tambe ta convence un hende mas pa vacuna, con mas lihe nos por crece. Na e momentonan aki nos ta den un porcentahe di recuperacion economico di 55%. Kico esey kiermen? Cu 55% di loke nos a perde, nos a recupera te cu awe. Cu bo sosten, cu bo aporte, cu mas participacion di mas hende na e vacunathon of vacunacion en general, nos por logra cu e porcentahe aki por subi ainda mas, cu nos por yega na e area di normalidad. Y pesey nos ta pidi tur esnan cu ta bay ricibi e vacuna e fin di siman aki pa invita un hende cu no a vacuna ainda, pa bay cu bo pa e tambe vacuna”, e dignatario a subraya.
“E rekisitonan ta, hiba bo carchi di AZV of e Health App y mi ta para un rato tambe na e personanan cu ta na Aruba y cu no ta documenta. Esnan no documenta, tambe nos kier pa vacuna. Den e caso aki, esnan cu no ta inscribi na Censo pero tin mas di seis luna ta biba na Aruba, ta bin na remarke pa e vacuna na Aruba, y nan mester bin cu un passport pa nan por prueba esey.
Den e fin di siman aki nos lo tin 150 personal riba pia, entre docter y enfermeronan pa por duna e miho servicio. Y pa esnan cu ainda tin duda si e vacuna aki di Pfizer ta bon pa bo of no, tin docter presente cu por duna splicacion y asina convence bo, talvez, pa toch bo tuma e vacuna” e dignatario a indica. El a haci un yamada na tur esnan cu a haya nan prome dosis di e vacuna durante e prome vacunathon, pa acudi na vacunathon-2 e fin di siman aki y percura pa hiba un hende cu no a vacuna ainda pa tuma esaki.
“Ta hunto na solidaridad ta bay logra vence e pandemia aki, y e efecto devastador cu tabata tin riba nos economia y nos pais”, Minister Presidente a conclui.
