Doño di tereno rond di e dam di Moko mester paga gasto di e limpieza di desperdicio cu BCI mester a haci

Robby Rosel a splica:

ORANJESTAD (AAN) – E vocero di Bureau City Inspector, Robby Rosel, a referi den entrevista cu DIARIO, na e caso di e dam di Moko, unda e ploeg di BCI mester a haci limpi e tereno rond cu tabata tin hopi sushi mes.

Rosel a menciona cu e doño di e tereno aki, ya cu ta un tereno priva, e mes tin cu asumi e gastonan y si e no cumpli, DIP mester cay aden inmediatamente pa haci e cobranza.

Diferente tipo di tereno a wordo haya y tambe a mira cu tin un cadena na entrada, cu ta duna impresion cu e lugar ta wordo habri pa hende bin tira sushi eynan.

Rosel a subraya cu e posibilidad tey cu ta asina y esaki ta bao di investigacion caba, y tan pronto tin mas detaye, prensa informacion lo wordo duna na prensa.

Ley ta prohibi tira sushi riba cualkier tereno, y si ta priva e sushi no mester ta riba un tereno cu gobierno a pasa pa un persona, of a bende cu ne. Rosel a manda un mensahe pa tur persona cu tin un tereno y cu ta pensa cu por tira desperdicio riba dje, of parti patras di nan cura di cas, esey ta crea un peligro cu ne y por haya un boet.