Richenel Stamper ta indica:
ORANJESTAD (AAN) – Den entrevista cu DIARIO, señor Richenel Stamper, funcionario di Departamento Progreso Laboral a amplio, tocante e proyecto piloto di DPL, pa cuminza yuda un grupo di 15 dama, subi e mercado laboral.
El a reitera cu prome cu e trayecto DPL a haci e huiswerk di haci un “intake” individual pa saca afo kico ta e circumstancianan cu e persona ta confronta awo, y kico e falta pa por haya un trabao.
A base di esey DPL a hinca nan den e trayecto aki, unda ta duna nan e oportunidad pa pasa un entrevista y haya trabao.
DPL su rol ta tambe pa splica nan den e tayernan di trabao, entre otro, riba nan derecho y obligacionnan como un buscado di trabao.
“Pues kico e mester tin den su man pa yega na e dunador di trabao y haya un trabao” el a enfatiza.
Tin diferente motibo pa cual e personanan aki no tin trabao. Richenel a subraya cu cada hende tin su motibonan personal pero un di nan, cu ta mas comun na Aruba, aworaki ta transporte.
“Si bo wak bon e transporte, si bo ta papia di e sector di Horeca pa un hende yega na e area hotelero tin cu tuma dos bus, si e ta biba pariba di brug, cual tin biaha ta hopi costoso pa un hende cu no tin entrada, of cu tin un entrada cu no ta yega pa esaki. Otro reto ta falta di informacion, falta di guia, problema personal, problema familiar, unda cu e dama ta prefera keda cas y percura pa su yiunan y wak con e ta haci prome cu e bay busca un trabao”, el a subraya.
Stamper a duna di conoce cu tur esaki DPL ta atendiendo cu ne, cu profesionalnan den e trayecto aki. Tur esnan cu ta facilitador den e tayernan di trabao ta profesionalnan cu sigur ta hende bon prepara pa atende cu e grupo aki. Den e trayecto aki nan lo haya e guia necesario, tanto individual como den grupo, pa nan por haya un trabao mas lihe posible.
Primordialmente a cuminza cu un grupo cu ta cliente di Departamento di Asunto Social (DAS) pero tambe clientenan di DPL cu no ta den e grupo di DAS sino cu nan ta djis buscado di trabao.
“E plan ta cu den futuro e trayecto ta bay ta pa tur hende cu ta busca trabao. Tin hende cu frecuentemente ta ripiti nan bishita na DPL, loke ta duna impresion cu nan tin algo cu ta stroba nan pa haya trabao, y consecuentemente nan ta keda bin na DPL. E grupo ey nos ta bezig ta analiza, pa den futuro e siguiente trayectonan, nan bin na remarke como e prome candidatonan, y despues di esey pa tur hende cu ta interesa pa haya e trayecto aki, cu ta gratis y cu nan ta mas cu bon bini!” Richenel Stamper a conclui.
