Docter Jamiu Busari a gana premio ‘Jan Heijlman 2022’

Reconocemento  internacional pa specialista na Hospital di Aruba

ORANJESTAD (AAN): Varios studiante medico cu a pasa nan stage na Aruba a dicidi pa nomina pediatra y decano Jamiu Busari pa e Jan Heijlman prijs di Vrije Universiteit Amsterdam (VU).

   Den henter e cupo di nominacion di diferente parti di Hulanda y Caribe Hulandes unda cu VU tin un cooperacion pa manda studiantenan (coassistenten) core stage, el a resalta. Hospital ta hopi orguyoso cu un di su specialistanan a logra sobresali como miho specialista y cu esaki pone Aruba den ‘spotlight’ alavez.

   E asina yama ‘Jan Heijlman Prijs’ ta un premio cu anualmente ta ser otorga pa Co-Raad di VU (Conseho di studiantenan medico) na e miho den 5 categoria esta; miho specialista, miho stage, miho assistent di docter, miho localidad pe training clinico educacional (Klinisch Training Onderwijs, esta KTO) y miho docente di KTO.

   Docter Jamiu Busari, a duna di conoce cu e no tabata sa mes cu e premio aki ta existi pero cu e ta hay’e  importante pe reconocimento di educadornan pa nan desaroyo pa duna les y supervision. Pa docter Busari, esaki ta nifica un logro grandi pa ta scogi como e miho specialista. E ta algo fantastico cu Aruba tambe ta riba mapa pa duna aporte ne desaroyo di futuro docternan.

   Studiante medico Emma van Kempen ta splica e motibo cu a nomina docter Busari. “Esaki ta pa su forma di ta cu e pashentnan. Tambe no por lubida e proyecto “Jump 18” cu el a inicia. E ta un colega great, tin bon conexion cu e studiante y ta hopi envolvi cu ful e team di studiante na Hospital. Ademas, e atencion cu e tin pa stimula e desaroyo personal di e studiantenan ta masha importante.” Esakinan ta un paar di motibo entre hopi cu van Kempen ta menciona di ta agradecido p'e.

   Maud Zwolsman a duna di conoce cu na momento cu el a cuminsa traha cu docter Busari, el a haya e impresion di no ta solamente studiante medico pero ta forma parti di e team di docter. E ta lagabo sinti como colega unda cu por tuma decision entre otro ora di trata pashent. Esaki ta haci cu Zwolsman a sinti su mes cu e tin un luga den hospital y den un team unda e tambe por laga su bos resona. Loke mas e gusta ta cu semper e ta stimulanan pa pensa critico. Di con tin cierto maneho, pakico cierto tratamento ta miho?  Dus no solamente sigui regla of e guia automaticamente pero pensa mas leu, kico tin su tras.

   Director di Hospital, Jacco Vroegop, ta conta cu e ta hopi orguyoso cu un di e specialista di Hospital a logra gana un premio tremendo asina ki y cu esaki ta laga Aruba resona den exterior. “E ta demostra cu nos mes por, nos mes tin experticio den cas y cu inversion den educacion y personal ta esencial. Educacion ta fundamental den e desaroyo di un ser humano y pa Hospital esaki ta demostra cu sigui inverti den hende y den cuido di salud ta sumamente importante.

   Jamiu Busari ta un persona cu ta eherce su trabao cu hopi pasion. Ademas, e ta stimula coleganan pa tuma decision critico y tambe ta laga nan sinti cu nan ta parti di un team. Masha pabien docter Busari cu e bunita reconocimento aki.