ORANJESTAD (AAN): Recientemente investigadonan di Florida Atlantic University y University of California a descubri un especie nobo di cocolishi cono dilanti di costa di Aruba.
Habitando e lama seco di Malmok e especie aki ta representa solamente un di e mas di 180 especienan di molusco haya durante un investigacion di veld recien, mustrando Aruba como un "hotspot evolucionario" unico pa e region.
Cocolishi cono ta cocolishi predatorio di lama cu casca estampa di color, cu bo ta haya den henter tropico. E Cocilishi di lamanan aki tin custumber di biba den awa seco y ta utilisa un djente hol yena cu veneno pa paralisa su presanan. Te poco tempo pasa, tabata pensa cu e mas di 600 sortonan di cocolishi cono tabata pertenece na e mesun genero; sinembargo, investigacion genetico awor a descubri cu e especienan aki ta pertenece, de facto, na varios genero diferente.
Hotspot evolucionario: E ambiente cerca di costa di Aruba ta unico pa varios motibo, un di esakinan ta su poblacion rico y endemico di molusco. E porcentahe halto di endemismo haya rond di e isla ta indica cu Aruba ta representa un "hotspot evolucionario" distintivo dentro di e region. De facto, den transcurso di e encuesta di campo di un siman, investigado David Berschauer di Universidad di California a topa cu mas di 180 especie diferente di molusco na Aruba.
Un di e especienan aki a wordo determina despues como un subespecie nobo Jaspidiconus hendrikae, nombra asina na honor di Hendrika Wendriks, mama di un conocido buceado y malacologo amateur di Aruba, Jordy Wendricks. E especie nobo aki por wordo haya a lo largo di Malmok Beach, un area na e parti extremo nort di Aruba. E especie di Jaspidiconus ta habita den awa seco y, pa motibo di su capacidad limita di plama bay leu, hopi biaha ta exhibi grado halto di endemismo. E especie nobo aki tin un promedio di alrededor di 14 mm di largura y e ta bira fini na tur dos extremo. Aunke e ta similar na e especie J. vantwoudti, e especie nobo aki ta di un color geel bibo y tin rij chikito di punto maron.
Implicacion: Na nivel mundial, e habitatnan marino tropical ta menasa debi na desaroyo di costa, contaminacion, sobrepesca y cambio climatico. E perdida di habitat aki ta provoca un efecto drastico di perdida rapido di especie. Aunke historicamente e cocolishi cono a wordo pasa por halto, estudio nobo ta descubriendo su gran importancia. E venenonan di algun cocolishi conico awor ta ganando reconocimento pa nan posibel uzonan medicinal. Ya varios di e venenonan a wordo desaroya y nan ta uza nan como blokiado di dolor. E proteccion di e biodiversidad unico dentro di costa di Caribe Hulandes no solamente tin un gran balor ecologico, sino cu nan por contene e clave pa futuro avance cientifico den un serie di otro campo.
Raporta bo observacionnan: Bo a observa cocolishi of otro especie? Raporta bo observacionnan y potret di naturalesa riba e website di DutchCaribbean.Observation.org of descarga e app gratis (iPhone (iObs) y Android (ObsMapp). E informenan di especie di e comunidadnan local y e turistanan ta invaluabel pa e esfuersonan di conservacion di naturalesa pa yuda aumenta e conciencia publico pa proteccion general di e especie. Ademas, DCNA, Observation International y Naturalis Biodiversity Center ta trahando hunto pa desaroya un app di identificacion di especie automatisa pa bo telefon. E potretnan cu bo upload ta di gran balor pa haci esaki posibel. Si tin pregunta, por comunica cu This email address is being protected from spambots. You need JavaScript enabled to view it.
