RCC Aruba a causa furor den audicion di America's Got Talent 2022

ORANJESTAD (AAN): Grupo di acrobacia RCC Aruba (Rhythms Cirque and Dance Company) a causa furor cu nan acto den temporada 17 di America's Got Talent (AGT) den episodio di diahuebs 26 di Juli 2022 riba NBC Network.

E grupo forma pa ocho persona, a mustra nan habilidad y precision den nan acto, cu a impresiona huesnan Simon Cowell, Heidi Klum, Howie Mandel y Sofia Vergara.

   Prome cu e presentacion di e acto, director di e grupo Diego Jaramillo Ospina a conta cu e grupo tin e mihor show na Aruba, y cu apesar cu originalmente nan ta di Colombia y Cuba, Aruba ta nan cas desde 20 aña pasa.

  Jaramillo a conta e huesnan cu ora nan a yega, esaki tabata un caos pa nan, pa motibo cu nan a haya hopi problema cu nan props. Tur cos a worde perdi den aeropuerto di Atlanta. Apenas un ora prome cu e show, nan a haya algun prop, pero mester a fia varios articulo di ekipo di produccion di e show. Na dado momento nan a kere cu nan no lo por presenta den e show, pasobra nan acto ta hopi peligroso. Howie Mandel a bisa: "e tin dos palabra: carry-on" cu a causa harimento di tur presente. E super modelo Heidi Klum a expresa cu e grupo mester ta hopi nervioso pasobra nan no tin nan mesun props.

   Por a wak con e hurado y publico a keda boca habri cu e maniobranan peligroso di e grupo.

   Na final di nan presentacion, actriz Sofia Vergara a bisa cu e presentacion tabata increible, tabata excitante y sexy. Y el a keda hopi asombra cu e grupo no tabatin nan props y e ta hopi orguyoso di nan.

   Tur cuatro miembro di hurado a bisa 'si' pa nan sigui den siguiente rond.

   Na januari 2022, e grupo di acrobatista a participa na un competencia  internacional di Circo ‘Budapest Circus Festival’ cu ta e di tres competencia internacional di Circo mas reconoci rond mundo. RCC Aruba a cosecha hopi exito durante e Circus Festival na Hungria y a gana e tercer premio di brons. Esaki tabata un tremendo logro pa e grupo, mirando cu esaki tabata e prome biaha cu nan a actua contra mihor artistanan di circo di Italia, Rusia, Hungria, Spaña, Etiopia, Cuba y Ucrania.

   Grupo RCC ta hiba orguyosamente nomber di Aruba y ta briya na unda nan bay. Segun informacionnan, nan lo participa den otro Festival Internacional di Circo na September di 2023, despues di reanuda nan gira na Paris, Francia, cu Cirque d'Hiver Bouglione.