Docentenan di Colegio Arubano ta pidi retiro di directiva di SVOA

ORANJESTAD (AAN): Diahuebs atardi un grupo grandi di maestro di Colegio Arubano a presenta na Bestuurskantoor hunto cu presidente di SIMAR, pa entrega un carta na Prome Minister.

Ora cu Prome Minister Evelyn Wever Croes a bin tuma e carta, presidente di SIMAR Josephine Albertus a splica e mandatario cu mainta ora cu e maestronan di Colegio Arubano kier a entrega un carta na bestuur di SVOA (Colegio Arubano), esaki no a cay den bon tera di e bestuur, unda cu e bestuur a falta e docentenan respet.

“Mi ta compronde si bo no kier tin respet pa sindicato, pero bo mester tin respet sigur pa bo trahadornan, pasobra sin nan bo scol no ta draai y abo no lo tabata tey”, segun Albertus, kende a indica cu esaki a pone cu docentenan di Colegio a dicidi di bay busca ayudo.

Nan a dicidi di bin cu e carta pa Prome Minister pa expresa e deseo tambe pa e bestuur baha, mirando cu nan no tin confianza mas den e directiva.

Presidente di SIMAR a presenta Prome Minister cu e carta firma pa 91 di e 95 docentenan cu ta traha na Colegio Arubano.

Tres no a firma pasobra nan ta AO y e otro ta traha solamente part time.

Presidente di Algemene Leraren Vergadering (ALV) Everick Rincones a lesa na Prome Minister kico tin den e carta, unda cu el a bisa entre otro cu e docentenan ta haya cu den diferente area e bestuur di SVOA no ta cumpli cu ‘behoorlijk bestuur’ y ‘good governance’.

“E directiva aki no ta trata e empleadonan na Colegio cu profesionalismo y respet y ta impone y prohibi cosnan sin dialoga cu e docentenan y demas personal”.

“Tambe ta asina cu den aña 2020 tin docentenan cu ta traha na e scol sin cu nan contrato ta regla, locual ta un tarea importante di e mesun directiva aki”.

Esaki ta parti di e carta cu ta bisa tambe cu e docentenan tin un cultura di reuni, papia y dialoga riba e cosnan cu ta trata nan scol, mientras cu e directiva aki no ta dialoga cu e docentenan, sino ta tuma decisionnan unilateral sin consulta cu nan.

Pa e motibo aki via e carta e docentenan a pidi retira di inmediato di e miembronan di directiva.