Docente Gunn a mustra cu e mes lo huramenta como Parlamentario

ORANJESTAD (AAN): Segun e Kiesregeling di Aruba, como cu Partido MAS a obtene 2 asiento den Staten, e ora ta esun number 1 riba e lista,

esta Drs. Marisol Lopez-Tromp tin di huramenta, y tambe e number 2 cu ta sigui su tras, esta Aquannette A. Gunn.

   Anteriormente a tende cu tin un supuesto ‘gentleman agreement’, esta un protocol firma cu candidatonan di Partido MAS, y esey lo pone cu e siguiente persona cu mas voto lo bira Parlamentario.  Den e caso ey a mustra cu ta candidata #4, esta Solangel Dinmohamed-Lacle.

   Mientras cu e lider di partido Marisol Lopez-Tromp a haya 4.191 voto, despues di dje a sigui Solangel Dinmohamed-Lacle cu 189 voto.  Aquannette Gunn a haya solamente 77 voto.

   Sinembargo ta mustra cu ta docente Aquannette Gunn a indica cu e protocol ey firma den MAS no ta valido mas, y e mes lo bay huramenta.  Esey el a confirma den un boletin cu el a emiti Diamars mainta.

   “Un protocol no tin validez mas, si acaso un persona haci maluso di dje,” ta loke docente Gunn a bisa.

   “Na e momentonan aki, ami Aquannette A. Gunn a dicidi di reacciona relaciona cu tur joke ta bayendo rond riba medionan social,” el a indica.  “Na prome luga mi kier enfatisa cu segun e Ordenansa Electoral ami a keda apunta pa forma parti di e 21 parlamentarionan di pais Aruba pa e siguiente 4 aña.

   El a bisa cu ta berdad cu den Partido MAS, cada candidato a firma un protocol cu tabata un palabracion interno y ta basa riba confianza.

   “Mi persona no ta confia señora Solangel Dinmohamed-Lacle debi na su comportacion insano durante henter e campaña cu a laga un sabor amargo y di desconfianza cerca mi persona,” Aquannette Gunn a indica.  Aki el a agrega, cu e candidata Solangel Dinmohamed-Lacle a usa e protocol como herment di campaña contra di su mesun coleganan door di pidi hendenan vota p'e y no pa su coleganan.

   Segun Aquannette Gunn, e candidata di MAS Solangel Dinmohamed-Lade no tabata sigui palabracionnan haci durante reunionnan di partido, mucho menos e tabata respeta nan. Tambe el a practica canibalismo politico.

   “Pues e tabata pidi mi famia y amistad no un forma insistente y persistente pa vota pa su persona envez di mi. Esaki pa mi ta muestra di falta di etica y falta di colegialidad y pa mi el a demostra di ta un persona inconfiable.”

   “Si durante henter campaña el a sa di viola palabracionnan haci, ki garantia partido MAS por tin den integridad y honestidad di un persona asina.”