Asuntonan cu a wordo trata lo splica bida na Aruba entre 2017 y 2021 - *21 Arubiano tabata representacion di Aruba den crisis nacional y pandemia - *Lucha y sobrevivencia moral y financiero di Aruba den un pagina cu ta cera awe
ORANJESTAD (AAN) — Awe pa ultimo bez e constelacion di Parlamento cu a wordo forma a base di eleccion 2017, lo bini hunto.
Nos sigur mester para keto na cambio cu ta tuma luga den e representacion directo di Pueblo di Aruba, cu pa medio di cada un miembro di Parlamento, ta duna contenido na e gobernacion directo di Pueblo na e pais.
Awe tin tur motibo pa para keto y pensa kico a pasa cu Aruba for di momento cu na 2021 e constelacion actual, a reuni.
Mester bisa, cu tabata tin cambio hasta den e fraccionnan cu originalmente a duna contenido na e constelacion.
Na momento cu Presidente di Parlamento awe cera e reunion di Parlamento, representacion di Pueblo di Aruba na futuro generacionnan, e parti oficial di historia di Aruba.
Den Parlamento cifranan cu a mustra kico a pasa na Aruba, a wordo trata. Historia lo papia di un crisis financiero enorme y supervision di Reino Hulandes.
Pues no ta awor mester bisa cu Hulanda lo por tin voz den loke ta tarea basico di Parlamento, pero for di momento cu Hulanda pa salvaguardia bienestar di Aruba, a exigi medidanan cu mester a wordo tuma.
Awe pues Pueblo di Aruba ta entrega na historia e relato financiero di Aruba cu durante e temporada tras di lomba, a conoce incertidumbre grandi riba tereno economico.
Na 2017 ainda Aruba tabata papia di un refineria di Citgo, aunke ya tabata obvio cu e bienestar economico cu a wordo anticipa, lo no a bira realidad.
Aruba a drenta 2018 na bordo di estado di bancarota manera Reino Hulandes a afirma.
Aruba a drenta un epoca di austeridad manera medidanan cu mester a wordo tuma, a trece dilanti.
Den sala di Parlamento di Aruba, e pais a discuti e futuro nobo for di 2017 ora e forma cu tabata maneha Aruba te 2017, mester a cambia pa Aruba por a sobrevivi.
Ta den sala di Parlamento situacionnan serio a bini dilanti.
Durante e ultimo periodo di Parlamento, integridad tabata un palabra cu sigur a haya atencion. Integridad, cu awe ta keda e tema principal di Aruba, cu un constelacion cu conoce un miembro den prison.
E periodo cu ta cera awe a atende cu un pandemia, cu a basha economia di Aruba abou y a exigi medidanan firme y un acuerdo cu Reino pa Aruba por a sobrevivi.
Na mes momento e sobrevivencia moral di Aruba ta wordo entrega na un constelacion cu lo mester cambia ley pa sigura cu e base principal di Aruba, cu ta moral di e Pueblo Arubano, wordo fortifica cu decisionnan kende por ta miembro di Parlamento, cu directamente ta curpa, cara y alma di Pueblo di Aruba.
Ta cu integridad como e bandera mas importante cu mester simbolisa Aruba, DIARIO ta despedi di e constelacion actual di Parlamento di Aruba.
