Den rotonde di scandal e yiu perdi a haya caminda pa luz di publicidad - *Benny den prison ta tremendo momento pa Mike skirbi su buki nobo - *El a bolbe for di su haltura pa busca aplauso di e Pueblo cu el a laga sin pan
ORANJESTAD (AAN) — Uno di e puntonan historico cu Aruba lo alcansa e siman aki, ta e regreso di Mike Eman den Parlamento. Por papia aki di un punto historico, no pa motibo cu Mike Eman a logra algo grandi, pasobra pa ta sincero, e unico falta cu el a haci durante e ultimo cuatro aña tabata, pa e bin duna cuenta di loke el a haci cu placa y bienestar di e Arubiano.
Por bisa cu den un rotonde di scandal, e yiu perdi a haya caminda pa luz di publicidad, cu ta e estilo di bida cu politica so por a ofrece na uno di e politiconan cu mas a duna prueba di loke ta manipulacion.
Na 2017 probablemente Mike Eman a pensa, cu Aruba lo a bay roga su persona pa por fabor bolbe den gobernacion. Esaki no a sosode y awe Mike no a drenta como un ganador, pero como un persona cu a perde e trono cu el a crea pa su mes como “votegetter” cu un margen di diferencia cu Evelyn Wever-Croes, cu ni sikiera reconteo di voto por cambia.
Arogancia total ta yena aire di Aruba cu e forma cu ainda Mike y su partido ta pretende di por papia despues cu atrobe AVP a logra entrega Aruba otro scandal.
Mike Eman ta prepara pa bay haci su entrada den e Parlamento, den e representacion di Pueblo cu el a laga den hamber, den miseria social, den crisis total, despues cu el a abusa di e confiansa cu Aruba a pone den su persona, cu a perde oportunidad di bira uno di e artistanan mas grandi cu mundo di teatro y pelicula lo a produci.
Un historia falso ta loke Mike Eman a skirbi pa e por a logra destrui bienestar di Aruba.
Mike Eman mester tin berguensa di presenta su mes ainda na un Pueblo, cu a keda marca pa e maneho di abuso di su gobierno cu a cubri Aruba na tur forma cu deshonor.
Pasobra ta deshonor tabata e marca di Mike Eman ora despues di e veredictonan di e escandalo mas grandi den mundo politico di Aruba, el a decidi di postula su mes pa eleccion 2009, ora e mester a cumpra Aruba cu e promesa destructor di baha BBO cu mita.
El a kita atencion di Aruba for di loke realmente tabata pasa na Aruba ora e tabata prepara pa proclama su mes lider di Aruba, cu mester a sconde su cara pa berguensa di e caso Fondo Desaroyo Nobo San Nicolas, cu a bira e caso di corupcion cu AVP a regala Pueblo di Aruba.
Mike a zink Aruba cu baha BBO cu mita pa asina e haya popularidad cerca e Pueblo di Aruba, cu su partido a laga den lodo di berguensa ora Ministerio Publico y Ministronan di AVP condena pa corupcion, a yega na un areglo misterioso riba beach.
Unda ley a keda na e momento pa Mike Eman cu awe kier lastra e sistema legal di Aruba y instancianan oficial di Aruba den lodo pa e bolbe haci su entrada?
Na 2017, ora Pueblo a grita cu ta basta pasobra Mike a destrui e situacion financiero, economico y social di Aruba, Mike a bay sconde pa despues di su derota no mester wordo presenta cu e berdadnan di su gobernacion cu el a sconde mientras e tabata manipula sentimentonan di Pueblo, cu a perde su autonomia financiero.
Awe Mike Eman kier sigui manipula y ta uza e investigacion penal contra su “back to back” den prizon, pa asina porfin haya oportunidad pa bolbe drenta Parlamento, representacion di Aruba cu el a uza pa su show.
Pasobra pa Mike politica a bira un estilo di bida. Un oportunidad pa e por a hunga importante rond mundo, cu el a entrega historianan falso di su realidad pa e haya aplauso cu e no merece.
Politica pa Mike Eman ta e plataforma pa tur luz ta dirigi riba su persona, sinta den su Penthouse, mientras e pober Arubiano a wordo castiga cu e maneho di abuso cu el a hiba.
Politica ta un estilo di bida pa Mike Eman cu awe ta uza e estadia di Benny Sevinger den prison pa e por bolbe den e Parlamento, e representacion di Aruba, cu el a destrui despues cu Pueblo di Aruba a bira e vehiculo pa e haya posicion y publicidad pa por skirbi un buki y mas buki, mientras realidad mester keda scondi!
