Docente Croes di SPO Santa Cruz ta splica riba e ‘yabi di exito’ di e scol

Nan tin un Bingo fin di otro luna

ORANJESTAD (AAN) Juffrouw Croes, Docente di PVL y Miembro di e Comision ademas di Counselor, na Scol Practico pa Ofishi (SPO), area di Santa Cruz, den entrevista cu Matutino DIARIO a duna informacion tocante e  contenido di e scol aki: “E yabi di exito”.

   El a cuminza bisando cu hopi hende ta busca informacion, na unda SPO ta situa. El a menciona cu tin SPO Santa Cruz y SPO Brasil.

   “Mi kier cuminza na splica cu SPO ta un scol secundario na nivel special, unda cu nan ta traha y guia e alumno na un nivel adapta, eigenlijk individual.  Loke nos ta haci ta prepara e alumnonan pa na por drenta den e mercado laboral, den diferente area. Nos tin e area di Comercio, Area di Administracion, e area Facilitair, Area Cuido General, Area Tecnico, Area Cuido di Mata y Bestia”, Juffrouw Croes a splica.

   El a agrega cu e Area Cuido di Mata y Green nan tin’e na scol mes, y e alumnonan cu ta bay afo ta bishita Santa Rosa unda tambe nan ta haci nan stage of ofishi.

   “Na e scol aki e alumonan ta haci un interne stage den klas 2, Klas 3 nan ta stage den un compania, hopi biaha ta den hotelnan, y Klas 3 y 4 nan ta cuminza prepara pa specializa den e area cu nan gusta. Manera mi ta splica, nan ta hoben. No tur ora, di biaha nan ta scoge ki nan kier. Ta cu tempo cu ta pasa nan ta defini cual area nan ta gusta mas, por ehemplo area di cushina of area di comercio.  Asina ey nan ta yega na kico nan kier, anto djey nan nos ta sigui guia nan”, docente Juff. Croes a relata.

   E docente a sigui splica cu danki na tur e lugarnan di stage cu ta coopera cu e scol, cu duna nan e guia specializa, ta duna nan e pasenshi y amor, nan alumnonan por stage cerca nan y despues nan ta bay traha cu e compania tambe.

   “Tin di e studiantenan aki ta sigui haci diferente curso anochi, tin di nan ta cuminza traha, e ta depende ki aña nan ta caba, pasobra akinan nan ta drenta cu 12, 13 aña, nan por caba cu 18 aña esey ta si nan bay cinco aña. Si nan bay menos cu 5 aña ta pasobra nan a haya un trabao caba, y nan kier sigui traha den un area laboral, na unda hopi bez e lugar di stage a siña nan”, Juffrouw Croes a relata.

   Fundraising: Scol SPO Santa Cruz ta organizando un fundraising y bingo, na cual juffrouw Croes ta invita henter pueblo di Aruba pa coopera cu e scol aki, door di participa den e bingo. Nan por gana dos mil Florin sin conta e premionan special cu ta bay tin pa tur hende.

   E bingo lo tuma lugar dia 30 di Mei 2026, pa 7’or di anochi.