Brindando un Experiencia Vibrante pa Generacionnan

Tierra del Sol Golf Course by Iberostar:

ORANJESTAD (AAN): Manera ta conoci, henter e propiedad di Tierra del Sol Golf Course a wordo adkiri door di Iberostar Resorts & Hotels.  Nan tin amplio experiencia den maneho di canchanan di Golf tanto den Caribe y na Centro America y demas partinan di mundo.

   Prome cos cu nan a haci ta pone man na obra, pa renoba e cancha famoso aki di Aruba.  E renovacion di Tierra del Sol Golf Course by Iberostar a wordo diseña pa eleva e experiencia di hunga golf, contribuyendo na un balor agrega pa e propiedadnan rond di dje y reforsando e prestigio di e area.

   Siman pasa DIARIO tabata presente na momento cu Iberostar a celebra nan di prome aña operacional na Aruba.  Aki a elabora un rato riba e desaroyo na Tierra del Sol.

   Bao di un modelo di maneho basa riba cuido ambiental, e propiedad a pasa den un transformacion completo. Tur e greens y tees a wordo completamente renoba y a haya yerba nobo pa garantisa condicionnan di wega optimal, apoya pa un sistema di irigacion completamente modernisa y eficiente.

   Den e fase final, e fairways y e driving range a haya yerba nobo y preparacion pa e reapertura grandi di e 18th hole golf course. E evolucion aki ta bay mas leu cu e yerba mes; e ta inclui practice facilities modernisa (incluyendo mats nobo y ball trays nobo) y un experiencia refresca pa e huespednan cu borchi nobo y facilidadnan renoba na hole 6 y 15.

   “E reapertura di Tierra del Sol Golf Course by Iberostar na 2025 a entrega un campo completamente renoba bou di un modelo di maneho enfoca riba genera balor pa e doñonan di propiedad, apoyo na e comunidad local, y preserva bida salvaje nativo. Un pilar di e compromiso aki ta e creaccion di Aruba su prome Shoco Sanctuary, cual ta proteha 20% di e populacion di e specie endemico aki,” Ashiko Martinus, Director di Tierra del Sol Golf Course by Iberostar”, a splica.

   Hotel nobo na Tierra del Sol: Manera cu DIARIO a trece dilanti caba den su edicion di Diabierna,    Eynan Iberostar ta finalizando proceso pa bay construi un Hotel mas.  E Hotel nobo ey lo bay bira e prome Hotel cu ta 100% auto-suficiente den awa.  Segun Arnaud Le Lanchon, gerente general di JOIA Aruba, na Tierra del Sol nan lo bay construi un Planta di Filtra Awa, y esey nifica cu nada di riolering di e lugar aki lo wordo manda pa Bubali Plas.

   E Planta di Filtra Awa aki lo bay produci ‘gray water’ cu Tierra del Sol y e Hotel nobo eynan lo haci uzo pa muha tur mata di nan paisahe, y di e cancha di golf.  DIARIO tin di remarcsa cu “gray water” ta describi awa cu ta sali for di doucha di baño, badkuip, labamano, y wasmashin.  E awa ey NO ta inclui awa di WC y tampoco labaplato di cushina.  E awa conoci como ‘gray water’ ta wordo uza rond mundo pa muha mata of yerba.

   Tabatin rumornan incorecto cu a circula encuanto e Hotel nobo aki na Tierra del Sol, y gerencia di Iberostar a haya necesario pa duna aclareacion riba esaki.

   Prome punto ta cu e Hotel aki lo no wordo construi na Beach di Arashi.  Hecho ta cu e Hotel lo wordo construi riba tereno di Tierra del Sol.  Esey nifica pa bo drenta of sali di e Hotel aki, bo tin di drenta via e actual entrada grandi di Tierra del Sol.

   Na Tierra del Sol tambe nan lo traha un ‘Shoco Boulevard’ for di banda di e Hotel bay te na e Faro di California.  E lo wordo traha cu varios neishi cu Shoconan lo por bay haci uzo di dje.

   Ademas, envez di traha cura di muraya di bloki, nan lo bay bek den e forma tipo di Aruba, cu ta traha cura di transhi y trankera.  Tur esaki den nan plan di sostenibilidad, y e hecho cu lo kier purba pa e Hotel bay produci lo menos desperdicio posibel, cual ta cay den e vision di e compania madre Iberostar pa tur nan resortnan rond mundo.