Directie Luchtvaart Aruba preparando pa bira lider di aviacion den Caribe

Ministro Ursell Arends:

ORANJESTAD (AAN): Durante ultimo siman Aruba a ricibi ICAO (Organization Internacional di Aviacion Civil) su team di expertonan pa asisti Departamento di Aviacion Civil di Aruba (Directie Luchtvaart Aruba), pa un evaluacion di e leynan y procesonan actual di e departamento.

   Esaki ta den cuadro di asistencia tecnico cu ICAO ta ofrece bou di e programa cu yama “Systemic Asistance Programme“ (SAP). E asistencia aki a worde haci posibel danki na esfuersonan cu a worde haci na februari di e aña aki, unda un delegacion di Aruba, consistiendo di minister di transporte, Sr. Ursell Arends, representantenan di Directie Luchtvaart, Sr. Edwin Kelly y Sr. Anthony Kirchner, a haci un biahe pa Mexico pa reuni cu ehecutivonan maximo di ICAO. Durante e biahe aki minister Arends, hunto cu director regional di ICAO, Sr. Cintron, a firma intencion di compromiso pa implementacion di e programa menciona, cual ya caba ta den proceso pa worde implementa.

   Un biahe unda delegacion di Aruba mester a haci un esfuerso grandi pa defende derecho di Aruba pa sigui probecha di beneficionan di aviacion civil. Ningun pais tin derecho pa avion subi y baha. Esaki ta un privilegio cu ta worde otorga na esnan cu ta cumpli cu reglanan internacional di aviacion civil. 

   Tin cu bisa cu actualmente Aruba ta cumpli cu gran parti cu e tratadonan internacional, danki na esfuersonan di nos profesionalnan di Directie Luchtvaart, y otro stakeholdernan importante manera ANSA, aeropuerto y Meteo, pero asina mes no ta cumpli completamente cu tur. E ta un lastima, mirando cu a pesar di tur nan esfuersonan den e ultimo añanan, toch ta keda corto pa falta di sosten y compromiso politico na asuntonan di aviacion.  Esaki cu e consecuencia cu Aruba no por ta un lider regional. Un realidad cu a worde presenta tambe door di ehecutivonan di ICAO, durante un presentacion duna na e delegacion di Aruba.

   Cu e team di ICAO na Aruba, Directie Luchtvaart Aruba ta cumpli cu nan compromiso di haci tur cos posibel pa implementa procesonan pa mehora cumplimento cu standardnan internacional di aviacion. Tur esaki ta cai bou preparacionnan pa un audit cu ta di suma importancia pa Aruba, mirando cu e lo eleva Aruba su nivel di siguridad di aviacion, cu tin impacto directo riba nos unico pilar economico, cual ta turismo pero tambe riba nos calidad di bida, ya cu nos ta importa mayoria di nos productonan. E audit official ta premira di tuma luga den e proximo aña.

   Minister Arends ta contento con e proceso aki ta canando y ta sumamente orguyoso di nos profesionalnan, nos yiunan di tera cu a mustra di ta dispuesto pa traha hunto cu e team di ICAO pa asina converti Aruba den un lider di aviacion den Caribe. Gobierno di Aruba ta reconoce e importancia di aviacion pa Aruba y lo dedica tur recurso disponibel pa Aruba por cumpli cu e reglanan di ICAO.