Albert Scholten di AFTA:
ORANJESTAD (AAN): Despues cu minister di Asuntonan Economico, Comunicacion y Desaroyo Sostenibel Geoffrey Wever a anuncia cu Aruba Fair Trade Authority (AFTA) a wordo institui y el a splica cu ta trata di un entidad huridico independiente basa riba ley, cu tin como tarea principal pa crea un nivel husto di competencia liber y sin restriccion pa tur compania na Aruba stimulando asina inversion, e mandatario a introduci Albert Scholten kende ta bay ta encarga cu e autoridad aki.
Scholten entre otro ta bay guia e expertonan di Aruba riba con pa set up e AFTA.
E experto Hulandes mes a hiba palabra durante e conferencia di prensa di e minister Diahuebs mainta.
Scholten a para keto riba e importancia enorme di competencia honesto y eficiente den comercio y inversion na Aruba. El a bisa cu tin un pregunta cu semper ta wordo haci y esey ta: Si bo tin un entidad independiente manera AFTA, kico ta bay ta e rol di e minister y esaki ta bay ta safe?
Segun Scholten, den tur pais cu tin un autoridad manera AFTA, bo ta wak cu e minister ta responsabel pa e sistema di maneho y e legislacion, mientras cu AFTA ta responsabel pa implementacion di e maneho, pero na un manera independiente.
“AFTA ta bay ta un organo independiente di bestuur y esaki ta nifica cu por haci investigacion na un manera autonomo y ora cu decisionnan wordo tuma cu tin consecuencianan legal, ta controla esaki via ley y no via politica”, segun Scholten.
El a indica cu esaki ta importante pa e sistema keda mas obhetivo y puro posibel.
Scholten a papia tambe riba kico ta nifica competencia entre empresanan y el a indica cu cada empresa si e kier ta exitoso, constantemente e mester adapta na e demanda, pa por mantene nan puesto den e mercado.
“Si bo no inverti den e relacion cu cliente y den e innovacion pa mantene bo clientenan satisfecho, bo ta bay sufri perdida”, segun Scholten.
