DIP hunto cu inversionistanan ta trahando riba un plan di transformacion di centro di ciudad 

Prome Minister Evelyn Wever-Croes: -  * No por laga e recuperacion bay sin pone extra enfasis riba Caya Betico Croes - * Ex edificio di Nicky Habibe ta bay bira un espacio di vivienda

ORANJESTAD (AAN):  Gobierno di Aruba a haci un presentacion relaciona cu loke ta e desaroyo di e Proyecto Oranjestad.

Prome Minister Evelyn Wever-Croes a indica durante e inicio di e presentacion unda a conta cu presencia di diferente director di departamento (DOW, DIP, DNM), comercio y inversionistanan, cu Aruba ta  den etapa nobo di recuperacion.

A mira cu e prome crusero a bolbe bek y poco poco ta mira mas desaroyo y ohala cu desaroyo ey por wordo mira den centro di ciudad den Caya Betico Croes, a declara.

Turismo ta recuperando tambe y aworaki si e tendencia aki continua ta cera aña cu un recuperacion di 68% y ta mihor di loke a premira den prome instante.

Wever-Croes a agrega cu esey ta indica cu otro aña ta bay yega na 100 porciento. Na comienso di e crisis a calcula cu esaki lo tabata na 2023.

No por laga e recuperacion bay sin pone extra enfasis riba Caya Betico Croes, centro di e ciudad. Esaki semper tabata e pulso di e economia y comercio a purba hopi cos. "Nos tur ta di acuerdo cu nos kier mira desaroyo. Nos sa cu desaroyo mester ta diferente", e mandatario a expresa.

El a bisa cu mester bin un combinacion entre vivienda y tiendanan. Mester haya locual mester bira e catalisador. Kico ta bay acelera esaki. A purba organisa actividadnan den Caya Betico Croes cual tabata bon bishita, pero el a keda na incidentenan.

A organisa un Innovation Week pa mustra kico por haci, sinembargo, a keda haya falta di e catalisador, a señala.

Ora cu el a tuma over e departamento di Infrastructura el a haya eynan hopi idea y hopi gana di mira tambe Caya Betico Croes florece.

Na December aña pasa el a pidi e departamentonan pa bin cu un plan riba con ta bay rebiba centro di ciudad y becindario. Den esaki DIP ta hunga un rol hopi importante, pero ta purba pa tur cuatro departamento traha hunto pa por haya e consehonan.

A base di esaki y di tur e interes cu tabata tin entrega caba na DIP pa trece desaroyo den Caya Betico Croes a bin ta planifica e presentacion. Locual kier logra ta mustra kico gobierno por haci di su banda cu e medionan limita cu tin conhunto cu e interesadonan, e inversionistanan, Evelyn Wever-Croes a indica.

Algo cu e siña den e ultimo añanan ta cu gobierno so no por haci'e y cu e comerciantenan so no por haci'e tampoco. Tin cu bay hunto, a remarca.

Gobierno tin e responsabilidad di ta catalisador den esaki. 

PLAN DI TRANSFORMACION 

Locual a haci ta cu DIP ta trahando riba un plan di transformacion di centro di ciudad  (Stadsherstel) y hunto cu diferente otro inversionista y stakeholders ta presenta un renobacion di e ex edificio di Nicky Habibe, cu ta bay bira un espacio di vivienda y di F&B. Esaki ta na e punta di e caya.

Pa loke ta e edificio cu tabatin e gasolin station na Lagoen, eynan tambe tin interes den desaroyo pa converti esaki den un espacio di F&B (Food & Beverage) y entretenimento y trece cambio den full e area di Lagoen, Prome Minister a duna di conoce.

E edificio di ex Douane, cu ta den centro di ciudad, eynan tin plannan hopi avansa pa remodela esaki y convirtie den un edificio di vivienda y cu espacio di parkeo, a bisa.

Otro desaroyo interesante ta esun di Juliana School/Beatrix School cu tambe e intencion ta pa hacie un scol cu ta cumpli cu e exigencianan di awendia.

Tambe tin e proyecto di vivienda cu a lansa dos siman pasa, cu tabata a base di un 'prijsvraag' cu a tuma lugar dos aña pasa pa traha vivienda sostenibel. Akinan e desaroyo di Caribbean Town a bin pa dilanti banda di Bushiri.

Banda di esaki a yega na convenionan cu Aruba Ports Authority NV (APA) pa hunto traha riba e desaroyo di centro di ciudad. APA tambe tin un plan hopi avansa pa desaroya na e terenonan di waf.

"Cu esaki loke nos ta purba yega na dje ta pa promove e capital di Aruba pa asina nos adapta nos capital na un modelo di combinacion  di desaroyo riba vivienda, parkeo, educacion, horeca, eventonan, pero manteniendo e originalidad y e monumentonan y e oficinanan".

Tambe lo percura pa tin mas mata (vertical y horizontal) den centro di ciudad ya cu esaki mester pa combati e efectonan di e cambio climatico.

'Pop-up Stores' tambe ta parti di e plan cu e meta di haci mas uzo di terenonan pa eventonan segun e temporada ta exigi. DOW ta trahando riba e part di riolering y DLV Kadaster ta asisti den e trabaonan cu mester tuma lugar pa loke ta trata e midimento, e mandatario a indica durante e presentacion.