Diesun pais a sigui e programa “Step Forward” organiza pa EUHUB di CEDE ARUBA

ORANJESTAD (AAN): EUHUB ta un programa resorta bou di CEDE ARUBA cu ta traha cu funding programs di European Solidarity Corps y Erasmus+.

  EUHUB tin como un di su metanan duna oportunidad pa eherce proyecto pa hoben y profesionalnan cu ta traha cu hoben.

   E programa di Erasmus+ titula “Step Forward” a ser organisa na Aruba den luna di November bou di guia di EUHUB di CEDE Aruba, Un total di 11 pais procedente di Europa y Caribe a participa. 

   E programa tabata tin un duracion di un siman, unda cu e participantenan a siña diferente strategia y habilidadnan practico pa yuda cu reto di salud mental pa nan mes y con pa atende cu hobennan, usando metodonan interactivo y den un sistema di educacion no-formal. Den e curso a enfoca riba intercambio y sensibilidad cultural, y a aborda problema di salud mental den un ambiente di colaboracion. Durante varios tayer, participantenan a explora temanan manera reflexion personal auto-observacion, necesidad personal, limitacionan, diferente triggers, y con pa atende cu relacionnan. A usa diferente método entre otro, debatenan interno, pintamento y baile. Participantenan a comparti nan experiencia y a trece posibel solucionnan hunto den un ambiente  y colaborativo, guia pa diferente ehercicio y sesion enfoca riba ‘teamwork’.

   Durante e siman di e programa, a introduci un anochi inter- multicultural, unda e participantenan mester a presenta den forma original un parti di nan cultura. E creatividad tabata hopi interesante, a presenta un show di baile, cuminda y bebida pero tambe quiznan y historia di e diferente paisnan participante cu tabata Corsou, Italia, Macedonia, Sint Maarten, Romenia, Slovenia, Polonia, Lituania, Serbia, Guadalupe y Aruba. Cu cultura di Carnaval di Aruba como atraccion principal, e actividadnan a entretene y a promove dialogo, motivando participantenan pa parti idea y practica, haciendo e anochi tanto rico den cultura y fructifero.

   Na final di e programa a haci un dia di evaluacion y reflexion. Unda a analisa contenido social y personal di e topico, comparti recuerdonan memorabel y con por mehora e programa den su totalidad. En general, e intercambio aki a fortifica capacidad profesional di participantenan, a cultiva mas comprensión cultural y conexion global. E experiencia a laga participantenan cu un metodo diferente pa yuda na empodera nos hubentud.

   Ta intencion pa EUHUB sigui ofrece mas entrenamento na Aruba y como tambe den exterior. Pa mas informacion con pa participa, por tuma contecto cu EUHUB - CEDE Aruba via Instagram @EUHUBAruba of yama Yolanda Smit na +297 5827666.