Mas y mas hende jong ta birando diabetico

POH Jasmira Mora Garces:

Tin un grupo cu n' kier tuma e responsabilidad di bay un dokter 

ORANJESTAD (AAN):  Jasmira Mora Garces, POH Coordinator na Wit Gele Kruis a laga sa cu aworaki nan ta ripara cu mas y mas hende jong ta birando diabetico. El a bisa cu e problema ta cu hopi biaha nan tin miedo. Ora cu nan ta haci e 'check-up' nan ta haya sa cu nan sucu ta halto, pero nan ta haya miedo di haya sa cu nan tin un malesa.

            Loke e hende aki ta haci ta cu nan no ta bay check mas. Eynan ta unda e problema ta sinta pasobra si bo cuminsa di tempran haci bo 'check-up' cu por maneha e malesa na tempo n' lo tin niun problema.

            Awendia, a remarca, cu tur e remedinan cu tin pa sucu, colesterol, etc, esey ta malesanan cu por trata y cu por biba un bida normal sin of cu tiki consecuencianan. "Pero bo mester cuminsa haci bo control y cuminsa tuma medidanan bo mes", a expresa.

            Esey ta e grupo cu nan ta sinti nan mes ainda jong, pero cu n' kier tuma e responsabilidad di bay un dokter y atende cu nan malesa, a remarca.

            P'esey ta haci un yamado na comunidad y esey ta purba di haci cu cada 'check-up' na trabao pa bisa e hendenan pa zorg pa nan haci e chekeo, Mora Garces a agrega.

            Esaki ta malesanan cu por wordo trata. N' tin ningun necesidad pa sconde pa e malesanan, el a declara.