Loucette Reppenhagen ta duna splicacion di opleiding di Design Academy

ORANJESTAD (AAN): Recientemente DIARIO a entrevista Loucette Reppenhagen di Openbare Avondleergangen Aruba (OAA), tocante un opleiding di arte bao guia di Design Academy Aruba.

Segun Reppenhagen tin hopi creatividad riba Aruba y tin varios studiante cu talento.

“Locual ainda tabata falta na Aruba ta un pida opleiding, pa splica e escogencianan cu bo ta haci pa por logra un carera den esaki”, segun Reppenhagen.

El a sigui bisa cu pesey a dicidi di cuminza cu e opleiding di arte.

Tin dos tipo di arte esta uno cu ta sali for di bo sentimento, unda cu bo ta pone bo sentimentonan riba papel.

Tambe tin e parti di diseño, cu ta arte aplica.

Esaki ta nifica por ehempel cu bo ta traha t-shirts of producto cu bo por uza.

“Pesey nos ta un Design Academy y un Design Academy principalmente ta ocupa su mes cu traha producto pa wordo uza di berdad, manera e t-shirts menciona of un borchi di propaganda por ehempel”.

Bo tin mester di cierto elemento pa por conta e storia di bo compania y ta importante pa studiantenan siña esaki pa nos por duna forma na nos propio producto y branding riba e isla.

Tambe pa nos por diseña, produci, traha y bende esakinan, segun Reppenhagen.

El a splica por ehempel cu un graphic designer por diseña tur cos na un manera digital, despues di cual tin diferente manera pa produci locual a wordo diseña, por ehempel via di diferente manera di print, riba diferente material.