Diasabra mainta ya e bakinan di sushi a yena den prome ora

Acogida masal pa Dia pa Cuida Aruba:

ORANJESTAD (AAN): Pueblo di Aruba a responde masalmente riba e yamada pa participa na Dia pa Cuida Aruba. Ya prome cu 8:30’or di mainta, varios baki grandi di sushi instala den bario y na otro puntonan di coleccion tabata completamente yen. Na Watertoren San Nicolas, prome minister di Aruba, Mike Eman, a duna un actualisacion tocante progreso di e accion nacional di limpiesa. “Pa nos a keda sinceramente impresiona cu e reaccion di comunidad. E bakinan ta yenando mas lihe cu e capacidad cu nos tin,” prome minister Eman a declara.

   El a indica cu tabata drenta raportnan similar for di Noord, Playa, Dakota, Santa Cruz, Pos Chiquito, Savaneta y San Nicolas. Na tur e luganan aki, e bakinan tabata yenando hopi mas lihe cu inicialmente a spera. “Esaki ta algo hopi bon, pero tambe e ta un reto. Nos tin e trucknan riba caminda pa piki e bakinan, haci nan bashi y pone nan bek,” Eman a splica.

   E acogida grandi ta mustra cu pueblo a responde en grande na e iniciativa. Sinembargo, e rapidez di cual e bakinan ta yena ta crea un reto logistico. E trucknan ta pasa continuamente pa piki e container yen, transporta nan pa e zona di desperdicio y pone nan bek pa comunidad por sigui haci uzo di nan. Debi na e acogida masal, por tin momento cu un punto di coleccion no tin baki disponibel. Ta trata di un situacion temporario, mientras e trucknan ta transporta e bakinan yen pa haci nan bashi. “E importante ta pa nos ciudadanonan wak cua ruta ta mas facil pa nan hiba e sushi cu nan a colecta. Esnan cu tin un tiki pura por a bay directamente na e centronan di desperdicio, cu ta keda habri continuamente,” prome minister Eman a bisa.

   For di Watertoren na San Nicolas, caminda e bakinan tambe a yena completamente den poco tempo, prome minister Eman a expresa su aprecio pa e reaccion di pueblo. “Hopi danki pa e empeño. Mi ta mira un berdadero empeño nacional. E cantidad di truck y hende cu nos ta mira na cada sitio ta impresionante. Esaki ta nifica cu pueblo a responde en grande riba loke nos a bin ta ofrece,” el a remarca.

   Eman a pidi comunidad pa tene cuenta cu, na algun caminda, e bakinan lo mester wordo kita temporalmente pa haci nan bashi. “Si bo mira cu un container ta completamente yen, of cu e baki no ta eynan pasobra nan a bay hacie bashi, y bo tin pura, acudi na un di e zonanan grandi di desperdicio,” el a conseha.