ORANJESTAD (AAN): E compania Optica Moderna N.V. recien tabata di fiesta,
como cu nan a corda e hecho cu 25 aña pasa, nan optometrista Angela Maria Cruz Beaine OD a drenta den nan servicio.
Optometrista Angela a gradua na e prestigioso Universidad De La Salle na Colombia, y desde 2001 ta trahando pa nan, hungando un rol fundamental den e crecemento di e compania y den e cuido di bista di miles di ciudadanonan na Aruba.
Angela a cuminza su carera na Aruba na e sucursal di Optica Moderna den PriceSmart. Cu su
profesionalismo y passion pa sirbi e comunidad, rapidamente el a pasa pa dirigi e sucursal di San
Nicolas, brindando un servicio personalisa y di halto nivel.
Durante e periodo aki, Angela a forma un parti esencial di e transicion y historia di e compania: (*) El a traha di cerca cu e fundador original di Optica Moderna N.V., defuncto Steve Bowen, siñando e balornan di servicio tradicional y atencion personalisa. (*) Tambe a adapta na e era di modernisacion hunto cu e yiu di e fundador, Alex Bowen, integrando tecnologianan nobo pa e servicio y cuido visual di mas avansa.
“Angela no ta simplemente un optometrista pa nos; e ta parti di e famia di Optica Moderna N.V.
y un pilar di confianza pa nos clientenan,” ta loke Alex Bowen a declara. “Su compromiso durante e
ultimo 25 aña nan aki ta e refleho di e calidad y e curason cu nos ta pone den nos trabao tur
dia.”
