Diasabra awor lo cende e luznan di pasco den Oranjestad

Minister Geoffrey Wever: Fiesta di Luz ta inicia

ORANJESTAD (AAN):  Diasabra 25 di november lo cende e luznan di pasco den Oranjestad pa 6or di atardi. Tur diasabra te cu 23 di december lo tin actividad den y rond di Caya G.F. Betico Croes, hunto cu specials y entretenimento musical. Un yamada ta bai na tur ciudadano pa bishita Oranjestad, sea pa compras of pa disfruta di e ambiente di temporada di fiesta.

            Ya for di basta dia por mira movecion den e area di ekiponan di DOW, entre otro instalando palonan di luz nobo cu lo provee hopi mas claridad cu esnan anterior, cual tabata un peticion comun di e comerciantenan den e area. Minister Wever a zorg pa tin decoracion adicional e aña aki, mirando e impacto positivo esaki tin riba sentimento di consumidornan, y tambe e sentimento di seguridad adicional cual ta importante pa e clima empresarial, specialmente den e temporada festivo aki.

            Minister Geoffrey Wever kier haci un na comunidad henter pa pasa desde 25 november proximo di 6:00 PM den centro di Oranjestad, y pasa unrato ameno den ambiente familiar di pasco y fin di aña. Na mes momento ta sostene empresarionan local, y contribui na un ambiente positivo di revitalisacion di nos centro di ciudad. 

E orarionan pa Fiesta di Luz ta como lo siguiente:

25 november, 6:00 – 8:00 PM, entretenimento: Las Unicas

2 december, 4:00 PM – 6:00 PM, entretenimento: Maruba

9 december, 4:00 PM – 6:00 PM, entretenimento: Las Unicas

16 december, 4:00 PM – 6:00 PM, entretenimento: Rumba Caribeña

23 december, 6:00 – 8:00 PM, entretenimento: Maruba 

KIDSPRENEUR$ BAZAAR

            Riba diasabra 25 di november, como tambe 16 di december lo tin e evento conoci di “Kidspreneur$ Bazaar” na Plaza Daniel Leo, organisa pa departamento di asuntonan economico (DEACI). Aki varios empresario hoben lo tin e oportunidad pa ofrece diferente producto na benta, manera artesania, joyas, cuminda y bebida y mas.

            Durante Kidspreneur$ bishitantenan por admira e creatividad di nos hobennan, y alaves sostene nan a traves di compras di nan producto.