E 'Toolkit' Codigo di Proteccion lo sirbi pa conscientisa y amplia e conocemento di e profesionalnan riba diferente tereno

Prome Minister Evelyn Wever-Croes:

ORANJESTAD (AAN): Riba dia Internacional di Derecho di Mucha, Prome Minister Evelyn Wever-Croes hunto cu demas colega minister y algun Parlamentario, tabata presente na e lansamento di e Toolkit di Codigo di Proteccion (CDP).

            Prome Minister a expresa cu e tabata un momento sumamente bunita, caminda a presencia e resultado di e dedicacion di e ekipo di CDP cu a haci esaki posibel. E CDP ta un plataforma digital caminda ta inverti den e profesionalnan door di di duna nan e hermentnan necesario, pa por eherce nan trabou mucho mas miho, y asina garantisa proteccion pa e muchanan.

            Sue-Ann Ras, como e persona encarga pa guia e ekipo chikito di e Departamento di Mucha y Hoben, a splica cu e CDP aki sigur ta un logro grandi pa pais Aruba y specialmente pa siguridad di e muchanan.

            El a indica cu e toolkit aki ta manera un ekipahe completo pa e profesionalnan, na unda tin casonan, informacion, quiz, y video riba diferente aspecto, cu ta trata di sospecho di abuso di mucha. E ta un contenido completamente local, na unda mas o menos 70 profesional a traha riba esaki pa yega na e contenido aki.

             Ras tambe a menciona cu banda di esaki, tambe tin e revista ASERTIVO, cu a wordo diseña cu e meta pa traha riba conscientisacion, y amplia e conocemento di e profesionalnan riba diferente tereno, manera di nos mesun hendenan y kico nan ta haci den veld, tambe kico tur nan como instancia ta para pe.

            E producto aki, a wordo realisa cu fondonan di Union Europeo, pero tambe a haya sosten technico, vooral den e parti digital, di Augeo Foundation y di Unicef Hulanda. E producto final a wordo presenta e aña aki na Maart.

            Prome Minister ta gradici na prome luga Minister Glenbert Croes pa introduci e team di Social Crisis Plan, cu na aña 2017 a cuminsa cu e iniciativa aki. Tambe, Minister Rocco Tjon, kende como Minister di Asuntonan Social, cu su vision, pasion y dedicacion a logra esaki. Un danki tambe na Señora Sue-Ann Ras cu a sa di guia e ekipo di Departamento di Mucha exitosamente. Pa Gabinete Wever-Croes, e siguridad di nos muchanan ta un prioridad.