*E matanan di ‘Waterhyacint’ ta causa molester eyden
ORANJESTAD (AAN): E aña akinan atrobe nan a cuminsa cu e trabao di bay ranca y saca tur e plantanan di waterhyacint cu ta aglomerando fo’i control den Bubali Plas.
DOW ta haci esaki conhuntamente cu Directie Natuur en Milieu, Directie Volksgezondheid DVG ARUBA y Parke Nacional Arikok. E mantencion akinan lo tin un duracion di mas o menos 1 luna.
Bubali Plas ta un saliña (wetland) mescos cu e saliñanan dilanti di hotelnan. Pa añas e saliñanan ta un punto mas abao y cu ta colecta awa di yobida prome cu bay lama.
Den decada di 1970 a construi e planta di purificacion na Bubali. E awa procesa ta bay den e saliña y e saliña den transcurso di aña nan a crece bira Bubali Plas cu nos conoce awe. Bubali Plas a trece hopi vegetacion, pisca y ta atrae hopi especie di parha. Bubali Plas su habitat a cambia di un saliña pa un awa permanente y cu esaki tin un biodiversidad mas diverso y consistente.
Pa mantene Bubali Plas ta rekeri un bon nivel di awa continuo den e plas. E nivel di awa den Bubali Plas mester ta sostenibel den temporada di awacero y secura. Bubali Plas tin un funcion di procesa e awa na un manera natural por medio di e mata nan cu tin den e plas.
Matanan agresivo: E reto nobo cu DOW ta topa cune atrobe, ta e ‘bloei’ agresivo di e plantanan conoci como ‘waterhyacint’ y esaki ta ocasiona un molester ora nan tapa e plas y ta muri, cual tambe ta afecta e calidad di awa den e plas. Un danki na Parke Nacional Arikok cu nan a yega na un acuerdo pa asina ya caba nan cuminsa ranca nan di eyden.
Ministro Ursell Arends tambe a pasa mira e trahadornan haciendo e labor di saca e Waterhyacint for di Bubali Plas.
