Diasabra awo 28 di October CVA ta presenta interesante simposio tocante Ataca cerebral

Na bispo di Dia Mundial Stroke:

ORANJESTAD (AAN)—Azriah Palm, Presidente di e Fundacion CVA Aruba, den entrevista cu DIARIO a menciona cu e aña aki, e Dia Mundial di Stroke ta cay riba Diadomingo 29 di October awo, y como Fundacion CVA ta traha pa educa nos comunidad, y lo tin e simposio Diasabra 28 awo.

E simposio lo tuma lugar na Teresita Center, cuminzando pa 8 or di mainta cu registracion y te cu 2’or di atardi e programa ta bay.

            E oradornan ta dr. Lacle, cu ta bay papia tocante stroke of atake cerebral, Maria Cobos cu lo papia tocante hipertension, cu ta conoci cu e ta un “silent killer”. Cobos ta bay duna conseho riba kico pa haci y kico por ta e causa cu por ocasiona stroke, si e persona no ta cuida su presion. Despues di cada dos orado lo tin 15 minuut pa haci pregunta.

            Despues di e coffie break (10’or) lo sigui cu e tema di nutricion bao guia di Sharlene Leslie, despues ta bay tin movecion cu Solange Eckmeyer, cu ta un persona hopi dinamico, y tin un programa pa adulto mayor, unda e ta duna informacion con pa preveni caida, locual ta hopi importante. Seguidamente, lo tin un tema hopi importante, cu e neurologo nobo Roberto Watkins, ta bay presenta cu ta protocol.

            Despues tin e siguiente sesion di pregunta (15 minuut) sigui pa un “light lunch break” y despues ta bay tin docter Alexandros Balasidis “Revalidatie Arts” cu ta e profesional cu ta pone un programa den otro hunto cu e fisioterapista, despues di un atake cerebral, pa asina e pashent move bek.

            Lo cera e conferencia cu participacion di Nannelle Croes, di “Transition 2 Health” cual tema ta “Hope after stroke”. Azriah Palm a comenta cu hopi hende despues di haya stroke ta kere cu nan no por haci nada mas. Nannelle ta bay bin cu un of dos pashent, cu a recupera 99.9%. Azriah a conclui bisando: “Dus, famianan cu ta na cas, of cu tin hende cu a sufri atake cerebral y no sa ki pa haci, mi ta  invita boso pa cumpra un ticket (prijs hopi razonable) aporta FCVA pa un bon causa, y haya informacion sumamente importante”.