DIARIO tabata presente na Bogotá durante e 13 edicion Festival Gabo 2025

*Un homenahe na e poder di e historianan y futuro di periodismo

ORANJESTAD (AAN):  Fin di siman pasa, matutino DIARIO tabata presente den un di e eventonan mas importante pa mundo di periodismo iberoamericano: e 13 edicion di Festival Gabo, cu a tuma lugar di 25 te 27 di juli na Bogotá, Colombia.

E evento a reuni mas di 150 invitado di nivel nacional y internacional y entre nan a destaca:

Joseph Stiglitz, un economista Mericano di renombre mundial, ganador di Premio Nobel, cu ta conoci pa su critica na desigualdad economico y globalisacion inhusto. Den su charla, Stiglitz a pone enfasis riba e rol di informacion y media den e lucha pa husticia social.  

Laura Zommer, periodista argentino y directora di Factchequeado, un medio di verificacion di dato importante den Latino America. El a enfoca riba combati desinformacion y e importancia di periodismo responsabel den e era digital.  

Carmen Aristegui, un di e periodistanan mas respeta na Mexico, conoci pa su investigacion riba corupcion y su defensa fuerte di libertad di prensa. Aristegui ta un simbolo di valentia periodistico den region.  

Dima Khatib, Periodista sirio-palestino y directora di AJ+, cu ta parti di Al Jazeera. Khatib a comparti su experiencia cu narativanan y e importancia di inclui bosnan marginalisa den media global.

Cristian Alarcón, escritor y periodista di origen chileno-argentino, fundador di Revista Anfibia. Alarcón ta conoci pa su estilo unico cu ta mezcla literatura cu cronica, creando un forma nobo di nara realidadnan compleho.

Rokhaya Diallo, activista y cineasta di Francia, cu ta dedica su trabao na combate di racismo y promocion di husticia social. Su participacion a pone enfoke riba inclusion den media y representacion digno di e comunidad.

María Jimena Duzán, un bos poderoso den periodismo colombiano, conoci pa su analisis critico y su compromiso cu e berdad. Duzán a participa den dialogo riba e rol di e periodista como defensor di democracia.

Durante e festival por a disfruta di mas cu 100 actividad gratuito y un asistencia di mas o menos 15 mil persona, convirtiendo Bogotá den e centro cultural y periodistico di e region.

E participacion di DIARIO den Festival Gabo ta un paso importante pa fortifica lazo cu otro medio y coleganan periodista di diferente pais. Eventonan manera esaki ta crea un plataforma ideal pa intercambia experiencia, pa siña di otro realidadnan regional y global y pa fortalece e compromiso cu un periodismo etico, independiente y innovador.

Durante e festival, cu e lema “Vernos de cerca”, a discuti temanan urgente cu ta afecta e gremio na nivel global, manera desinformacion, migracion, violencia, crisis climatico y e rol di periodismo den un mundo cambiante.

Periodista di DIARIO, Yorleny Oduber a participa den charla y tayernan cu a pone como enfoke e desafionan actual di periodismo, pero tambe e temanan manera narativanan nobo, uzo di tecnologia emergente y un enfoke mas inclusivo y transformador.

E evento tabata un homenahe na e legado di Gabriel García Márquez, fundador di Fundacion Gabo, cu ta celebra su 30 aniversario. E legado di Gabo no ta wordo mira manera un pedestal, sino como un simia pa sigui crece, pa reflexiona y pa busca un futuro pa e ofishi di conta historianan.

Participa den eventonan manera Festival Gabo ta reforsa e mision di DIARIO: sigui comprometi cu calidad, berdad y integridad periodistico. Tabata un oportunidad pa pone Aruba den mapa di periodismo internacional, y pa trece bek e conocemento y inspiracion pa e comunidad local.

Pa DIARIO, e experiencia na Bogotá ta mas cu solamente presencia den un evento; ta un compromiso activo pa sigui na altura di e reto cu periodismo ta enfrenta den un mundo globalisa.