Avion priva cu Arubiano abordo a cay na Florida

Siete hende herida den accident aki

• Tur dos hende den avion a keda herida
• E avion a cay riba un auto cu 5 hende aden 

ORANESTAD (AAN): Dialuna cu a pasa, un avion priva chikito cu dos hende aden, a cay cerca di Lantana Airport na Palm Beach County na Florida.

   Ta trata di un avion Orlican M-8 Eagle a caba di lanta vuelo atardi banda di 4:30 pm for di Palm Beach County Park Airport (yama tambe como ‘Lantana Airport’).  Despues di a cuminza bula, e avion a bira direccion panort pa cuminza tuma su rumbo.  Aki ta unda cu diripiente e avion a cuminza confronta problema.  Un rapport di Sheriff no ta menciona ki problema.

   Como cu e avion ainda tabata den e fase di adkiri haltura, e problema a pone cu el a cuminza cay, a dal den e parti mas ariba di un palo di coco, dal den dak di un Toyota Camry cu cinco hende aden, y a bay cay riba un voetpad den John Prince Park banda di e casnan di bario Lake Osborne Estates.

   Inmediatamente autoridad a ser poni na altura.  Diferente unidad di Bombero y Ambulance a yega eynan, y Polis a cera e area.  Tur dos persona den e avion tabata bibo pero herida.  E cinco personanan den e Toyota Camry tambe ta bibo, y en total 7 hende a wordo transporta pa Hospital.  Esnan di e avion a wordo transporta pa St. Mary’s Medical Center na West Palm Beach.

   E avion segun registro di FAA, ta pertenece na Valiair LC Trustee na Ogden, na estado di Utah.

   NTSB di Merca ta cuminza investiga e accident aki, y a nota cu ora cu e avion a cay no tabatin ningun candela, y Bomberonan a detecta ningun leak di jetfuel tampoco.  Daño na e parti dilanti di e avion ta basta extremo.

   Habitantenan di e bario unda e avion a cay, awor ta expresa preocupacion cu e accident aki, y nan ta halando rosea di alivio cu net e ora ey no tabatin ningun peaton, of mucha ta canando riba e voetpad aki.

   Arubiano abordo: Awor e oficina di Palm Beach County Sheriff a emiti nomber di e pilotonan di e avion priva aki cu a cay.

   Nan a wordo identifica como Thomas Peters di 51 aña procedente di isla di Aruba.  E otro persona tabata Duncan MacLaren di 29 aña, procedente di Delray Beach, Florida.  Nan heridanan no tabata grave, y a wordo describi pa docternan como “minor injuries”.

   NTSB a laga recoge e restonan di avion, y bay cu nan pa un Hangar na Jacksonville, Florida, pa nan por haci investigacion tecnico riba dje.

   Prensa Mericano a purba di contact e pilotonan, y tambe e doño di e avion, pero no a logra haya ningun contesta di nan.