Director di SVb Edwin Jacobs:
*P’esey SVb a recomenda gobierno bin cu Reparatie Toeslag
ORANJESTAD (AAN) – Director di SVb Edwin Jacobsa reitera, den entrevista cu DIARIO, cu 65 aña despues di a introduci AOV, cu e meta di combati y evita pobreza bao nos adultonan mayor, SVb a conclui cu e instrumento aki su so, no ta efectivo mas y nan a recomenda un reparatie toeslag.
“Gobierno ta siguiendo e pensamento aki (pensioen) pero tambe fortifica e reparatie toeslag, pa nos grandinan. Y si, e ta un preocupacion legitimo. Cu tin personanan ta yega cu pensioen hopi corta, hopi abao, pa motibo tambe cu nos tin un maneho di admision cu a permiti nan drenta, y mester haci algo tambe na dje. Si nos kier evita tin personal den futuro cu pensioen corta na nivel di 200, 300 florin, pa motibo cu nos a permiti nan drenta na edadnan di 50 aña.
Pa nos evita esey, nos mester percura e ora ey pa no duna permiso pa estadia na Aruba, personanan cu ta riba edadnan halto, pasobra nos mes tin cu contribui na hinca nan den nan behez den un situacion di pobreza, cu despues nos mes mester atende.
E ta un combinacion, e grupo cu t’ey, t’ey caba, y na mesun tempo nos ta aconseha gobierno pa mantene un maneho di admision cu ta demograficamente amicable, den sentido di fortalece bo parti demografico, door di no laga drenta Aruba (pa biba y traha) personanan di 45-50 aña”, director di SVb a remarca.
