DIARIO ta bay tras di cortina mundial pa compara Citgo cu Quanten

ORANJESTAD(AAN)-  Na 2018 DIARIO a entrega na Aruba prueba cu e matutino di DIARIO, tin e capacidad pa deshaci di limitacion di fronteranan pa asina informa Aruba na

e nivel mas halto di periodismo.

Tabata DIARIO cu a duna Aruba tur prueba na 2018, cu e proyecto di Citgo tabata un fantasia total y cu e compania cu mester a realisa milager economico na Aruba, no tabata tin ni placa pa para riba su pia.

Cu un luho di detaye e tempo, DIARIO a presenta e situacion financiero di Citgo, cu tabata e baca di lechi di Nicolas Maduro, cu a hipoteca e refineria na Rusia y e grupo di 2020 y asina a haci cu Venezuela den realidad ni por yama Citgo su compania.

Na e momento aki ningun politico di Venezuela por mishi cu propiedad di Citgo of mara Citgo na aventura pasobra ainda Citgo ta abou proteccion di gobierno Mericano, cu ta evita cu un cantidad di compania cu Citgo debe placa, ta podera di Citgo y ta laga Venezuela sin e compania na Merca.

Si Gobierno di Evelyn Wever-Croes no a deshaci di e acuerdo di Citgo, awe segun informantenan experto di DIARIO, companianan cu Citgo ta debe por a confisca pertenencianan di Citgo na Aruba tambe. DIARIO lo sigui riba e tema aki, pero importante pa Aruba ta bira informacion cu DIARIO a ricibi di su informantenan experto den exterior y cu ta haci posibel pa informa Aruba riba e posibel futuro di e luga caminda Lago tabata situa.

DIARIO ta papia di “e luga caminda Lago tabata situa” pasobra informantenan internacional ta indica, cu e compania Quanten Consortium LLc, debi na e personanan cu ta identifica nan mes cu e compania, no por permiti nan mes actua na un forma cu lo mancha integridad di companianan Mericano.

Informacion cu DIARIO a logra ricibi tabata mustra cu aparentemente e proyecto nobo pa un refineria na Aruba na e sitio di Lago, ta mara na un proyecto internacional di un grupo di inversionista Mericano cu ta traha a base di Consortium.

Esaki ta nifica, cu companianan especialisa y instancianan ta uni pa segun nan specialismo of posibilidad participa den un proyecto economico.

E respaldo di Quanten na Merca ta bini di dos instancia sumamente importante cu ta e Universidad di California na Berkeley y den esaki e figura di cientifico y consehero di Gobierno Mericano, Dr. Daniel Kammen, ta bini dilanti.

E hecho cu e Departamento di Relacionnan cu Exterior di Merca, ta uza hasta nan Consuladonan y Embahadanan pa presenta Quanten na mundo, ta refleha su mes den e trabou como Consehero di Secretarionan di Estado na Merca, cu ta Hillary Clinto y John Kerry.

Informantenan a mustra DIARIO riba e hecho cu actualmente John Kerry ta e Enviado Special di Merca pa Asuntonan di Clima pero e ta sostene Quanten Consortium LLc, cu ta traha pues directamente cu e Universidad di California.

Un particularidad a bini dilanti segun informantenan cu a papia di un proyecto cu nan a considera “morocho” na e proyecto cu Quanten kier trece Aruba.

Ta trata aki di un proyecto nobo conoci como “Soyo Refinery” na Angola, caminda ta e intencion tambe pa bini cu un proyecto di un refineria nobo, cu ta traha a base di e concepto energia limpi.

Aparentemente e consorcio kier crea dos compania petrolero, uno na cada banda di Oceano Atlantico, cu hunto mester ta bon pa refinera un cantidad importante di petroleo segun concepto di refineria limpi.

Mientras, manera siman pasa, na forma exclusivo DIARIO a informa Aruba, na Mei por spera finalisacion di e negociacionnan Aruba y Quanten, DIARIO ta sigui haci tur investigacion necesario pa por presenta Aruba informacion correcto riba tur compania cu bati na porta di Aruba y tin influencia riba e bienestar di Aruba.