ORANJESTAD (AAN): Organo Ehecutivo AZV a efectua un conferencia di prensa diamars mainta unda a pone enfasis riba e tema di e procedura pa peticion di
remedi.
Solange Tchong, Relacionista Publico di AZV a cuminsa bisando cu nan kier duna un splicacion un biaha mas riba loke tabata e cambionan pa cu e 'Lista Positivo di AZV' cu ta e lista di remedinan cu AZV ta ehecuta.
For di December 2020, AZV a anuncia cu lo ta bay tin un cambio den loke ta e remedinan cu AZV ta cubri. Sinembargo, esaki a dicidi di hala. Inicialmente, e fecha tabata 1 di Februari 2021, pero a hala esaki pa 1 di April 2021, a bisa.
Aworaki tin mas o menos tres siman bezig cu esaki y pesey AZV ta kere cu ta prudente pa duna un splicacion un biaha mas na e aseguradonan pa asina prepara nan mes pa ora di bay cerca nan docter di cas of botica, Tchong a indica.
Pa loke tabata e cambionan, a agrega, un grupo grandi a bira e remedinan di cuido propio. Tambe tabata tin un grupo cu ta wordo receta pero cu no ta wordo cubri door di AZV.
Con un asegurado por prepara su mes?
- Prome cu tur cos ta pa puntra cerca bo doctor di cas kico exactamente e ta receta bo. No solamente kico e ta, ki tipo di remedi e ta, pero tambe pakico, con mester tume, etc, e PR di AZV a remarca.
E asegurado mester por haya sa si ta un remedi di e categoria di cuido propio of e ta riba e receta pero AZV no ta cubri of e otro categoria cu por ta, ta esun di criteria. Esey kiermen cu ta solamente bao cierto indicacionnan AZV ta cubri e remedi ey.
- Otro aspecto importante ta cu un asegurado mester sa cu ora e ta referi un remedi cu e ta bay haya cubri door di AZV, bo doctor por informa bo esaki, pero mas importante ta cu e doctor lo tin cu skirbi e codigo ariba e receta cual ta esun cu AZV ta reconoce pa e wordo cubri.
- Tambe ta asina cu semper tin e opcion como asegurado pa bay botica y puntra un biaha mas kico ta e tipo di remedinan cu el a caba di haya. Tin hopi di e remedinan cu aworaki a bira e categoria di cuido propio.
