Awor cu berguensa a muri no mester duna contenido na Husticia pa Pueblo? - *Analisis di e caminda di Ley Electoral pa Ley di Control di placa di Pueblo - *Lo dura mas cu 20 aña pa reconteo final di costo proyectonan Bo Aruba
ORANJESTAD (AAN) — E hecho cu berguensa a muri ta bini dilanti den e caida total di moral, cu sigur ta haya un sosten grandi den e cantidad di casonan penal cu Huez mester atende y den cual politiconan ta envolve.
Cu berguensa a muri ta bini dilanti den documentonan cu ainda ta den estudio y documentonan cu por lo pronto lo conoce un resultado final pa loke ta trata e placa di Pueblo cu a wordo gasta dor di politiconan, cu kier keda den e ambiente cu ta produci nan placa y poder.
Reconteo a bira e palabra di momento. Reconteo di voto segun un sistema, cu votonan a wordo conta segun mes regla cu a pone tur politico cu a fungi como Prome Ministro, Ministro, Miembro di Parlamento na poder.
Reconteo tabata e ultimo forma pa trata na stroba eleccion 2021, despues cu ta e personanan cu awe kier reconteo mes, a haci cu a vota cu potlood.
Pa personanan cu conoce Ley di Aruba, e reconteo di voto no ta e aspecto mas importante na e momento aki, aunke naturalmente tin hende cu mester haya oportunidad pa habri nan boca atrobe den publico.
Pa nos importante ta pa analisa directamente e caminda di Ley Electoral pa Ley di Control di Placa di Pueblo, riba cual a trapa den e periodo di 2009-2014!
Tur ley ta topa cu otro den e base di Estado di Derecho, cu ta un pais manera Aruba cu ta wordo goberna completamente di acuerdo cu Ley, cu naturalmente tin buraco cu hende sabi conoce.
Na momento di eleccion, Pueblo ta dicidi kende ta e personanan cu ta bay atende cu su interes, cu su placa. Na momento di eleccion, Pueblo ta dicidi kende ta drenta Parlamento cu ta dicidi kende ta forma Gobierno, cu Parlamento mester vigila den tur aspecto a base di ley.
Continuamente Pueblo ta tuma nota di rapportnan cu a bini di uno of otro instancia, cu ta instancianan cu mester guia Parlamento. Raad van Advies ta duna conseho na Parlamento y Gobierno (incluso Gouverneur) riba tereno legal.
Pa Parlamento por haci su trabou di control, e tin Algemene Rekenkamer Aruba, cu ta duna Parlamento tur informacion cu e mester pa e por controla gastonan y entradanan di Gobierno segun Ley.
Ta Algemene Rekenkamer Aruba a traha entre otro dos rapport cu a duna prueba kico por pasa cu placa di Aruba, cu tabata e rapport Fondo Desaroyo Nobo San Nicolas crea dor di Gobierno Henny Eman y e rapport Bo Aruba, cu ta atende cu 1.6 Biyon di Pueblo di Aruba cu a wordo hinca den proyectonan Bo Aruba, crea dor di Gobierno Mike Eman.
E dos proyectonan ta topa den e falta di claridad, falta di base cu leynan ta exigi ora ta gasta placa di Pueblo.
Corte di Husticia a atende cu Fondo Desaroyo Nobo San Nicolas, cu a manda tres ministro prison, mester a bay den apelacion pero a termina den un encuentro entre fiscal y abogadonan riba beach.
Pa loke ta trata 1.6 Biyon, Pueblo a paga pa cantidad di compania, producto, tereno y asina por sigui pero mester paga tambe pa tur e debe cu a keda y cu ta sigui crece.
Ora nos analisa e realidad aki, nos ta mira cu awe Pueblo di Aruba ainda no ta na haltura sikiera cuanto finalmente e proyectonan lo costa.
Conteo y reconteo final di loke e proyectonan cu Mike Eman y Benny Sevinger tabata tin den nan man, lo tuma luga ora muchanan cu nace awe, tin 20 aña por lo menos.
Nos kier reconteo di final di e proceso electoral, cu tabata ora Gobierno Mike Eman a kibra Ley pa destrui bienestar di Aruba cu e acuerdo secreto, ilegal, cu Nicolas Maduro.
Nos kier reconteo di proyectonan Bo Aruba.
Nos kier reconteo di placa cu a kita for di boca di pobernan di Aruba, cu a pone baila pa nan no mira manipulacion!
